Your Daily News

Prime Minister-in hmasawnna atana Thawhpuiah Mizoram mipui a sáwm

0 474

Prime Minister Narendra Modi chuan December 16, Inrinni khan lehlángin Mizoram a rawn tlawh a, Lammualah Tuirial Hydro Electric Power Project (HEP) a hawng. PM Modi chuan, Mizoram mipuite Krismas leh kum thar lo thleng tur hlim taka hmang turin duhsakna a hlan a, Mizoram hmasawnna atana thawhpuiah Mizoram mipui a sáwm.

PM Narendra Modi chuan, Mizoram chu state ralmuang a nih thu leh a mi chengte pawh hawih­hâwm leh mi dang chunga ṭhate an nih thu sawiin, “India rama ziak leh chhiar tamna ber pakhat a ni,” a ti.

Cheng vbc. 1,302 chuang sênga siam Tuirial Hydel Project, Tuirial HEP chungchangah Prime Minister chuan, kawlphetha megawtt 60 pe chhuak thei Tuirial HEP hawn a ni ta chu Mizoram tan méllung pawimawh a nih thu a sawi a, “Tuirial HEP hi Mizorama Central Sector Project tihpuitlin lian hmasa ber a ni a, Mizoram tan socio-economic development thlentu a ni dawn a ni,” a ti a; Mizoram chu NE state-a mamawh zat aia tam kawlphetha siam chhuak thei state pathumna (Tripura leh Sikkim dawtah) a nih thu a sawi.

Tuirial HEP chu eco-tourism lam tihhmasawn nan leh tui in tur siam chhuah nan hman theih a nih thu sawiin Modi chuan, “Mizoram hian hydro-power megawatt 2,100 siam chhuah theihna a nei a, Mizoram hi kawlphetha hralh chhuak thei a nih loh chhan tur ka hre lo. Kan tum chu, India ram pawna hralh khawp kawlphetha siam chhuah a ni,” a ti.

Narendra Modi chuan, Tuirial HEP siamna atana tihfel ngaite chu sorkar laipuia prime minister Atal Bihari Vajpayee hun lai, kum 1998-a tihfel  a niin a sawi a; Tuirial HEP chuan kawlphetha a pe chhuak mai ni loin, tuikhuah chu lawng hmanga inkalpawhna ṭha siamtu leh sangha tam zawk thar chhuahna hmun a nih theih thu a sawi bawk.

India hmarchhak state-te chu hun eng emaw chen hmasawnna lamah hnufûm mah se, sorkar laipui hmalakna hrang hrang avang­in hmasawnna tam tak a awm tih sawiin Modi chuan, “Hmarchhak state pariatah self help group ṭha leh hlawhtling tak din zel niin, mipuite theihna leh thiamnate hai chhuak mek zel a ni a, hei hi Deen Dayal Antyodaya Yojana thil tum pakhat a ni,” a ti. Centrally sponsored scheme (CSS)-a Central leh state sorkarte sum intum sem dan chu hmarchhak state bik tan 90:10 a nih zel dawn thu leh scheme dangah erawh chuan 80:20 a nih thu a sawi a ni.

Prime Minister chuan, India ram independence a nih kum 75-na, kum 2022 a thlen hma kum nga la awm chhungin kawn hrang hranga ram hmasawnna turin ruahmanna fel tak siam a nih thu a sawi a, “India rama hnam, chi leh sakhua zawng zawngte kan intluktlang a, kum 2022-ah chuan India thar (New India) siam kan tum a ni,” a ti a; India ramah inelna thianghlim siam mek zel a nih thu a sawi.

PM Modi chuan, India rama district hnufual zual 115 chu thlur bing a nih dawn thu sawiin, chu’ng zingah chuan Mizorama district ṭhenkhat pawh a tel thu a sawi a; December 15, 2017-ah Central Sector Scheme pawm a nih thu sawiin, “NE Special Infrastructure Development Scheme hnuaiah kawlphetha, inkalpawhna, tui, zirna, hriselna leh tourism lama hmasawnna tur duan a ni,” a ti. He scheme thar hi NLCPR hnuaiah kalpui tur niin, funding pattern chu 90:10 a nih tur thu sawiin, “Central sorkar chuan NE state-te tan kum thum chhungin cheng vbc. 5300 a pe dawn a ni,” a ti.

Narendra Modi chuan, hmarchhak state khawpui tin rêl pawhtir tum a nih thu sawiin, “Aizawl pawh rel kawng lian chi hmanga pawhtir tum a ni,” a ti a; chu rel kawng siam tur chu kum 2014-a a lungphum a phùm tawh thu a sawi.

India sorkarin Act East Policy a kalpui mek tih sawiin Modi chuan, “Mizoram hi Act East Policy hnuaiah Asia chhimchhak lam ramte kal pawhna hmunpui a la ni dawn a, Myanmar leh Bangladesh nena insumdawn tawnna hmunpui a la ni dawn. Kaladan Multi Modal Transit Transport Project te, Rih-Tedim Road Project leh Border Haat-te buatsaih mek a ni,” a ti.

Prime Minister chuan, Mizoram chu ziak leh chhiar thiam tamna leh English hmang thei tamna a nih thu sawiin, “Model tourist destination state atan siam theih a ni,” a ti a; Mizoramin adventure tourism, cultural tourism, eco-tourism, wildlife tourism leh community-based rural tourism-te atan remchang a neih ṭhat thu leh tourism tihhmasawn nan kum hnih kal ta chhungin sorkar laipuiin Mizoram tan cheng vbc. 194 a ruahman a, vbc. 115 pek chhuah a nih tawh thu a sawi.

Infiamna chungchangah PM Modi chuan, “Football hi khawvel hriata Mizoram pho­langtu a ni,” a ti a; Mizoram chu Santosh Trophy-ah kum 2014 khan a champion thu leh Aizawl FC pawh I-League-a champion lai a nih thu a sawi. Mizote chu infiammi an nih thu sawiin, India ram pum huapa lang pha leh khawvel huap inelnaa India ram aiawh pha Mizo ṭhahnem tak an awm thu a sawi a ni.

PM Narendra Modi hian Tuirial HEP a hawn rual hian, ‘MyDoNER App’ a tlangzarh nghal a; start-up entrepreneurs ṭha zual pathum hnenah cheque a hlan. Union minister of state for Power (independent charge) RK Singh-a’n inlawmna thu a sawi a, Union DoNER minister Dr Jitendra Singh-a’n lawm­thu sawina hun a hmang.

Prime Minister hi Lengpui Airport-ah Governor Lt.Gen. Nirbhay Sharma, chief minister Lal Thanhawla, minister Zodintluanga leh chief secretary Lalmalsawma ten an lo hmuak a; chawhma dar 11 pelhah Lammual chhuahsanin, helicopter-in Shillong a pan nghal a ni.

Credit, vanglaini

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!