An Ram Chhungah ‘Coronavirus’ Tih Hming Lam Rik Khap Tlat A Ni
Khawvel ramah hian ram danglam leh mak dangdai tak tak hriat tur ting an lo awm ve zel a! Ram lar lutuk lemlo leh mi tam takin a hming pawh kan lam rik mang loh Turkmenistan ramah hian Coronavirus tih thumal leh hming lam rik khap tlat a nia, tumahin an hmai pawh an tuam tur a ni lo bawk tih a ni tawp mai a ni.
Tun thleng hian Covid-19 kai hriat tur an la awm lo tih tualchhung media te chuan an tarlang.
He Turkmenistan ram hi North Korea ram ai pawhin an turu zawk a ang hle maia mahse, khawvel mite hian a ramchhung chanchin hi hriat an ngah lo hle thung. Ramchhung media lam pawh sawrkar in control in doctor pakhat Coronavirus laka himna dan tur leh invendan lam a sawi rik avangin an that zui bawk.
An ram chhunga damdawi zawng zawng ah pawh Coronavirus tih thumal chu pakhat mah hmuh tur a awm lo niin an sawia, an ram President Gurbanguly Berdimuhamedow chu hmanlai lal thlah a nih angin rorelna khirh tak a kalpuia tumah thuawih lo leh mahni duhdana tal an awm lo an ti a ni.
Turkmenistan Chronicles in a tarlan danin he ramah hian natna hrik kai an awm anih pawhin an puanchhuah ngam an rin loh thu a tarlang. Mipui an khuahkhirhna a nasat em avang leh control-na an kalpuidan chu a turu hle a International Community leh Human Rights lamah hriattirna thu an thawn niin a tarlang bawk.
Source: INDEPENDENT
