American actor Mark Salling chu Thawhlehni khan kum 35 mi niin a thi a, mahni intihlum nia tarlan a ni.
Glee star Salling hi Los Angeles-a a chenna Sunland bulah thia chhar niin, lui kianga thingah a lo inkhai a ni. A thih dan hi chhui chian mek a ni a, mahni intihlum ngei a ni em tih fiah tumin an bei mek. Salling hi naupang kum tling lo saruak thla laksak chungchangah inhnamhnawiha puh niin, kum 2015 khan man a ni. Investigator-te chuan a computer-ah thalak duk dak lo 50,000 vel zet an man a, kum li aṭanga kum sarih thleng lungin tang tura hrem theih a ni. Buaina a tawh avang hian nikum khan amah leh amah intihhlum a lo tum tawh nia sawi a awm bawk.
A thih thu hi social media lamah a darh chak hle a, lainattu pawh a ngah hle. Glee-a inlanpui te chuan an ui thu an sawi tawh a, a chunga thil thleng hi pawi an tih thu leh, a kalsan tak a chhungte an lainat thu an sawi. Mark Salling hi TV series Glee aṭangin lar niin, mite hriatna ber pawh a ni. Kum 2009-2015 chhung khan a inlan a, mimal thilah harsatna tawh zui avangin a chanchin hriat zui tur a awm meuh lo.
Glee star leh crew member-te chuan Mark Salling an chan ta mai chu pawi an tih thu an sawi uar hle a, film lama a lo chanpui tawh te leh amah ngainatu mi tam takin an ui thu an sawi. Glee director Paris Barclay pawhin Salling a ui thu hi a sawi ve tawh bawk.