American singer-songwriter Dolly Parton chuan Billboard chart-a lan rei theih lamah world record a siam.
Dolly Parton hian Billboard Hot Country Song chart top 20-a lang rei thei ber leh, hmeichhe artist zinga lang hnember record a siam a ni. Parton chuan, “Guinness World Record bua ka hming a chuang ta hi ka lawm a, mumang rama cheng ang mai ka ni. Khawvelah zaithiam leh hlaphuah thiam mi ropui tak tak an awm laia kei teh lulin heting dinhmun ka thleng thei hi a mak zawk a ni” tiin record title certificate an hlan ṭumin a sawi. Kum 71 mi lai ni tawh Parton-i chuan, “Zai lam bul ka ṭan tirh ka ngaihtuah let a, hetiang hi ka tawng ang tih ka ring pha lo. Miten ka zai an hlut avangin ka lawm a, an zara tun hun hi ka thleng thei a ni” tiin lawmthu a sawi bawk.
Film star ni bawk Parton hian chawimawna ropui tak tak eng emaw zat a lo dawng tawh a, Country Music Hall of Fame, Grammy Hall of Fame leh Songwriters Hall of Fame-ahte pawh a hming ziahluh a lo ni tawh bawk. A hla hit zingah Jolene, Jumb Blonde, Coat of Many Colors leh I Will Always Love You-te chu tun thlenga mite hriat leh sakpui tam ber pawl an la ni fan. Billboard chart hrang hrangah a mikhual lo hle a, ṭhang khat lian tak zet dinhmun pawimawh luah thei a ni.
credit, vanglaini