Internet khawvelah kan chenga mi tute pawh kan inbe pawp zung zung thei a, harsatna tam tak pawh sukkian zung zung a awlsam phah hle a ni.
A bikin nula leh tlangval inngaizawng, hmun hla tak taka khawsate tan pawh internet chuan chhunzan zawmin min inbiaktir bakah thlalak leh mahni bialnu/ bialpate hmel pawh awlsam takin min hmuhtir thei tawh bawk. Mahse, saruak thlalak inthawn kual nana internet lo hman tangkai erawh thil tha a ni hauh lo.
Nu leh pa, nu leh tlangval tan pawh saruaka thlalak leh video thalo inthawn kual emaw, a nih loh leh mobile phone hmanga mahni saruak thlalak leh video lo kawl that chinte chu mahni tan a hnuah mualphohna thlentu a ni thei tih kan hriat reng a tul ani.
Tleirawl kum 16 a upa FatenllySa chuan a thil tawn mak tak chu Twitter lamah a tarlanga, a bialpa nen an inzuina pawh a la rei loh thu a sawi. Zankhat chu a bialpa, a hmangaih em em mai chuan a saruak thlalak a dila, a thawn duh loh thuin a chhang ve nghal a ni.
A bialpa chu a dilna a lo hnawlsak avangin a thinrim thut maia, tawngkam na takin thu a thawn leta “Ngati nge nang chauh ka hmangaih che ti chung siin ka ngenna che i tihhlawhtlin duh loh le. I tan engkim ka huam i ti si a, beiseina diklo min neihtir ta nih hi” tiin a âng zui hrep mai a ni. A bialnu chuan he a dilna avang hian a then zui tih a tarlang.
Nula leh tlangval tam tak chuan an thlalak leh video thalo tak takte an bialpa/bialnu hnenah an thawn darh a, khua reiah an hming tichhiatna hmanrua ah leh phuba lak nan an hmang let leh thin a ni. Zahna leh mualphona tawrh zawh loh avangin mahni nunna hial la ta te pawh sawi tur an awm tawh bawk.
