Your Daily News

Mobile App ah chhiar theih in a awm e

60th Annual Grammy Award Bruno Mars-a’n award paruk a dawng

0 244

Music khawvela chawimawina sem chhuah ṭhin zinga ngaihhlut ber pawl, Grammy Award chu Pathianni zan khan Madison Square Garden, New York City-ah sem a ni leh ta. Bruno Mars chuan award ngaihhlut hlawh tak tak paruk zet a hum haw a, award dawng hnem ber a ni. Kendrick Lamar chuan Rap huangah tuma tluk phak rual a nih loh zia tilangin, award panga lai a hum haw ve bawk.

A ṭobul

Grammy Award hi music industry-a chawimawina sem chhuah ṭhinah chuan ngaihlut ber pawl niin, a vawi khatna atan May 4, 1959 khan semchhuah a ni. Ngaihlut a hlawh em avangin kum tin sem chhuah ṭhin a ni ta a, kumin hi vawi 60 an semchhuahna a ni. Gramophone magazine chuan Latin music industry-a mi hlawhtlingte hnena an hlan ṭhin niin, a tirah pawh Gramophone Award tih a ni. A hnuah Grammy Award tia thlak a ni chauh.

Award ceremony hi Los Angeles khawpuiah buatsaih ṭhin a ni a, khawpui dangah chuan sem a ni ngai meuh lo. Kumin bikah hian Madison Square Garden, New York-ah sem a ni a, kum 2003 hnua Los Angeles khawpui pawna an sem lehna hmasa ber a ni bawk. Tun ṭumah hian award 48 zet sem chhuah a ni.

Tuma tluk rual loh Bruno Mars

American singer Bruno Mars chu mimala langsar ber niin, category parukah award dawng thei tura chhawp chhuah a ni. Bruno Mars hian a hming lanna category zawng zawngah award hui fai vekin, award sem zawh a nih meuh chuan tumah tluk rual loh a nih zia sawi nawn a ngai tawh lo. Award a dawn te hi ngaihlut hlawh tak tak an la ni cheu a, chung zingah chuan album, record leh song of the year te pawh a tel.

Kum 2016-a a tlangzarh 24K Magic chu Album of the Year leh Record of the Year atan thlan niin, he album-a a hla That’s What I Like chu Song of the Year atan thlan a ni. Bruno Mars hian R&B huangah award pathum a dawng bawk a, Best R&B Performance, Best R&B Song leh Best R&B Album atan thlan a ni. Heng award a dawnte hi 24K Magic album vanga a dawn vek an ni a, a hlawhtlinpui takzet a ni.

Kendrick kutah award panga

American rapper Kendrick Lamar chuan a dang nal avanga rap ve satliah a ni lo tih lantirin, Rap category-a award dawn theih zawng zawng a la fai vek! Rap huangah bik hian category pali – Best Rap Performance, Best Rap/Sung Performance, Best Rap Song leh Best Rap Album te awmin, award dawng thei tur hian rapper langsar tak tak Big Sean, Cardi B, Jay-Z leh Lil Uzi Vert te hming pawh a lang. Mahse a tak takah chuan Kendrick Lamar khum thei an awm lo a, award pali hi hlan a ni. Hei bakah hian Music Video/film huangah Humble hla hmangin Best Music Video award a dawng bawk.

Tute nge perform?

60th Annual Grammy Award-a perform turte hi a hmain puan a lo ni tawh a, khawvel huapa zaithiam lar leh langsar tak takte an inlan a ni. Kendrick Lamar chu American flag nen stage-ah a inlan a, lawm a hlawh hle. Boruak siamtu ber pakhat niin, stage-a a awm chhung zawng hian mipui lam aṭangin thawm a ring hle. Kesha chuan ‘Praying’ tih hla a sa a, a intheh ṭhil vel a hmuhnawm viau.  Kesha hi a perform lai hian Andra Day, Bebe Rexha, Camila Cabello, Cyndi Lauper, Julia Michaels leh Resistance Revival Chorus ten an ṭawiawm a, a zai zawh hian mipuiten standing ovation an pe hial a ni.

Tunlaia boruak nei lian tak Bruno Mars leh Cardi B te chu lawm hlawh ber zinga mi an ni a, an hla hit ‘Finesse’ an perform dun a ni. Puerto Rican star Luis Fonsi leh Daddy Yankee te chuan tun laia hla lar ber tih hial ngam ‘Despacito’ din chhuah puiin, he hla an sak lai hian mipui an ṭhu hle hle thei meuh lo. An perform tihmuhnawm zualtu chu an sir vela lam thiam lo che vel mawlh kha an ni. Mipui lamin an sakpui dual daul a, kham lo takin an hun an hmang zo.

Ṭum dang ang bawkin Lady Gaga che vel a hmuhnawm leh pek a, stage-a a inlan ve tawh chuan mit leh beng a tlai ṭhin hle. Gaga hian piano nen bul a rawn ṭan a, a inchei mak sak leh viau bawk. DJ Khaled, Rihanna leh Bryson Tiller-te perform ho a hmuhnawm a, Little Big Town te che velin mit a titlai viau bawk. Kum lama inthlau tak Elton John leh Miley Cyrus te an zaidun bawk. Pink, Sam Smith leh Shakira te pawh inlan zingah telin, anni bakah hian hriat hlawh lutuk loh mi eng emaw zat an inlan a ni. Zaithiam bakah hian milar tak tak hmuh tur eng emaw zat an awm bawk.

Award dawngtute

Bruno Mars leh Kendrick Lamar te an lansarh zanah hian Ed Sheeran, Chris Stapleton, Shakira, Alessia Cara leh The Weeknd te chu award dawng zinga langsar an ni.  Ed Sheeran chuan Best Pop Solo Performance award a dawng a, Chris Stapleton hnenah Best Country Solo Performance leh

Best Country Song award hlan a ni. Best Latin Pop Album award chu Shakira hnenah hlan niin, award ngaihhlut hlawh Best New Artist chu Alessia Cara chuan a dawng. The Weeknd chuan Best Urban Contemporary Album award a dawng ve bawk.

Hetih lai hian khawvel huapa zaithiam lar eng emaw zat zingah award dawng pha lo an awm nual a, Tayloar Swift chu a langsar ber awm e. Taylor hian Coutry huangah Chris Stapleton a tluk lo a, ani bakah hian award dawng thei tura rin kai dawng pha lo an awm nual bawk.

———

60th Annual Grammy Award Winner langsar zualte :

Album of the Year : Bruno Mars (24K Magic)

Record of the Year : Bruno Mars (24K Magic)

Song of the Year : Bruno Mars (That’s What I Like)

Best New Artist : Alessia Cara

Best Pop Vocal Album : Ed Sheeran (Divide)

Best Rock Song : Foo Fighters (Go To War)

Best Rock Album : The War On Drugs (A Deeper Understanding)

Best R&B Performance : Bruno Mars (That’s What I Like)

Best R&B Song : Bruno Mars (That’s What I Like)

Best Urban Contemporary Album : The Weeknd (Starboy)

Best R&B Album : Bruno Mars (24K Magic)

Best Rap Performance : Kendrick Lamar (Humble)

Best Rap/Sung Performance : Kendrick Lamar Featuring Rihanna (Loyalty)

Best Rap Song : Kendrick Lamar (Humble)

Best Rap Album : Kendrick Lamar (DAMN)

Best Country Song : Chris Stapleton (Broken Halos)

Best Country Album : Chris Stapleton (From a Room: Volume 1)

Best Jazz Vocal Album : Cécile McLorin Salvan (Dreams and Daggers)

Best Jazz Instrumental Album : Billy Childs (Rebirth)

Best Latin Pop Album : Shakira (El Dorado)

Best Music Video :  Kendrick Lama (Humble)

Best Music Film : The Defiant Ones Various Artists)

Leave A Reply

Your email address will not be published.

This site uses Akismet to reduce spam. Learn how your comment data is processed.

WP Facebook Auto Publish Powered By : XYZScripts.com