UFC President Dana White’an fighter tha mi Khabib chu a tawp khar nan leh a fight number tih kim nan vawi khat chauh UFC octagon ah lo kir leh se tih a duh thu a sawi ta mauh mai.
Dagestani fighter hi hriat tawh angin UFC 254 Main Event-ah Interim Lightweight Champ Gaethje submissiona a hneh hnuah insual atanga a chawlh hlen tawh tur thu a puang zui a nih kha!
He fight ah hian second round-ah ke hliam chungin Gaethje lakah hnehna a changa, mittui nen lungchhe takin Jon Anik hnenah a pa Abdulmanap, a coach ni bawk boral tawh hnuah in fight a tum zui tawh lo tih khawvel MMA fans-te hriat ah a puang zui ta a ni.
A gloves leh canvas Octagon chhuatah dah thain a pa tel lova a lo kir leh tawh ngai loh tur thu chu a chham chhuak zui bawk. A nu hnenah pawh a pa tellova a insual chu a tum loh thu leh hei hi a insual tawpna a nih tur thu hrilhin, thu a lo tiam tawh avangin a thusawiah a dinngheh a tul tih a sawilang bawk.
Khabib chuan a hmaa a lo tum lawk tawh angin Couching lam chu a pa hnungzuiin luhchilh a tum thu a lo sawi tawha, hlawhtlinna a chan a vawi 29-na ah a thutiam leh a kalna tur kawng chu a thlang fel ta bawk.
Vawi 29-0 zet hneh loh nei hauh loin lo chak tawh mahsela, Dana White chuan a thutiam chu sut leh hram tur leh a fight vawi 30 tlin nan Octagon ah lo kir leh turin a sawm tih The Zach Gelb Show ah a sawi chhuak. White kum 51 a upa chuan ‘The Eagle’ hi a lo kir leh a ring nghet tlat tih a tarlang bawk.
A lo kir leh a nih ngat chuan UFC Hall Of Famer leh former Champ George St-Pierre chu a beihpui tur no.1 a ni tih sawi tel bawk.
A ni bakah hian Tony Fergusion pawh a hmachhawn theih thu sawiin, vawi engmaw zat an pahnih in fight tur chu cancel lo ni mahsela, El Cucuy chuan beidawng loin a nghak reng tih a tarlang bawk. Lo kir leh se a fans-te an lawm a kim ngei ang le.
Ref: SPORTS BIBLE
