Your Daily News

UFC-ah Mayweather kan hmu dawn?

0 626

UFC superstar leh lightweight world champion Conor McGregor-a’n boxing ring chhungah boxer ropui Floyd Mayweather a hmachhawn dawn nia sawi a awm khan mi tam takin an awih lo a, nuih ti zatu mai a ni.

Mahse, August 26, 2017 a lo herchhuah meuh kha chuan khawvelin ring chhunga McGregor leh Mayweather in fight a hmu ta ngei a, a tira thil awihawm lo kha a tak ngeiin a thleng – thla tam a la liam lo, Mayweather leh McGregor bawkin thu thar an nei leh a, chu chu fighter pahnih hi UFC-a an inhmachhawn mai theih thu a ni tlat mai!

Khawvelin August 26-a thil thleng an hre tawh a, he thil hi awih loa nuihliam ngawt chi a ni lo – a thleng thei tih hi a hretu chu nang leh kei kan ni.

‘Money’ Mayweather

Mayweather-a’n instagram-ah live hmangin McGregor nena an inhmachhawn theih thu hi a sawi chhuak a, social media lama a follower-te a barakhaih. American boxer ropui chuan, “Hmanni lawkah khan call ka dawng a, ring chhung rap leh turin min sawm a ni. Rawn let leh nghal thei dinhmunah ka ding a, ka duh phawt chuan UFC-ah hian lutin octagon-ah fight ka hmachhawn thei ang,” a ti.

Vantlang hriata a sum neih leh a neih rohlu phochhuah nuam ti ve tak Mayweather chuan sawi chhunzawmin, “Octagon-ah fight pathum pali vel neiin dollar tluklehdingawn chuang lakluh ka duh mai thei asin. Hei hi theihnghilh suh u, Floyd ‘Money’ Mayweather ka ni tih hi,” a ti a, sum vang chuang eng pawh a tih theih thu a sawi.

Hei le Dana!

Mayweather-a’n instagram live hmanga a thusawi hi mi tam tak chuan ‘vaupung’ satliahah an ngai a, ‘social media titi’ ang maia en liamtu an tam. Mahse, American boxer hi a lo ṭawng mai mai hauh lo – UFC president Dana White chuan kum 40 mi fighter hi MMA huang chhunga zuang lut tura indawrna an neihpui ngei thu a sawi tlat!

Dana White chuan, “Floyd hi UFC-a fght neih chungchangah kan dawr ngei a, hei hi thudik tak chu a ni e. Conor McGregor nen boxing-a an inhmachhawn tur chungchang sawi a nih pawh khan tuin nge ring che u? Floyd hian thil tak tak ni lo a sawi in hre tawh ngai em ni?” tiin zawhna a siam let a, fighter ropui pahnih inhmachhawnna chance a awm thu a sawi.

Kawng awlsam a ni

White chuan Mayweather-a thawhpui, a management team-te chu dawr nuam tak an nih thu a sawi a, a bik takin a adviser Al Haymon leh Mayweather Promotions CEO Leonard Ellerbe te chu a fak. UFC president chuan, “A nihna dik takah chuan Floyd leh Conor-te an inhmachhawn hma khan boxing ring chhungah an din dun theih tak tak ka ring lo. Mahse, pa smart leh kawm nuam Al Haymon-te i ṭhutpui a, i titi pui tawh chuan thil thleng thei lo tak tak a awm lo,” tiin a sawi.

UFC president chuan Mayweather fak nghalin, “Floyd hian mipui hriatah chuan sum leh thil dang dang a sawi kual a ni mai thei a, a nihna takah chuan thawhpui nuam tak a ni. Kan indawr tawhnaah khan sawisel tur ka hre lo,” a ti a, tluang taka inbiakna neih theih a nih a beisei.

A theih alawm!

August 26-a fighter pahnih an inhmachhawn khan boxing khawvela la inlan ngai lo McGregor-a’n huaisen takin fight a hmachhawn a, mah se round 10-naah Floyd hian technical knockout hmangin a tukdawl – tunah erawh an inhmachhawn a nih chuan boxing dan hnuaiah ni loin Mixed Martial Arts dan hnuaiah an inhmachhawn ang a, kut chauh ni loin ke nen lam an hmang tawh ang.

Dana chuan, “Floyd thawhpui hi kan chak a, a nihna dik takah chuan he fight hi thil thleng thei a ni. Mayweatrher vs McGregor kha mipui rin loh takin a thleng tawh a, thil thleng thei lo a awm lo,” tiin beiseina a nei sang hle – kum 2013-ah Octagon-ah Mayweather kan hmu dawn em? Hunin a hril ang.

 

credit,vanglaini

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!