World number 1 hlui Maria Sharapova chuan nimin khan Kazakhstan nula Zarina Diyas chu 6-3, 6-3 a hnehin Shenzhen Open semifinal a lut.
Russian star Sharapova hian thla 15 hrem a nihna chu season hmasa khan a hmang zo a, world ranking nei lo aṭanga bul ṭan khan hma sawn zelin tunah chuan number 59 a ni tawh. Final lut tur chuan Kristyna Pliskova leh Katerina Siniakova te inkhela chak zawk a paltlang leh a ngai dawn a ni.
Tun inelnaah hian kum 30 mi Sharapova hi seeded pawh ni phak loin a inlan a, match thum a khelh tawhah set khat chiah a la hloh. China-ah hian nomawi a chawi a nih chuan inrintawkna sang tak nen Australian Open a khel thei ang.
Grand Slam vawi nga champion tawh Sharapova chuan, “Winners vawi 24 ka vua a, ka ball vuak a ṭha hle. Chutih rualin ka ṭhat dan berin ka la khel chhuak lo, a zawna match thum ka chak tawh avangin semifinal-ah chuan inrintawkna ka nei sang tawh hle turah ka ngai,” a ti.
Quarterfinal dangah Irina Camelia Begu chuan Timea Babos chu 7-5, 7-5 a hnehin semifinal a lut a, Begu-i hian seeded pakhatna leh champion tura rinkai ni bawk Simona Halep a hmachhawn ang.
credit, vanglaini