Tun season-a beisei phak lo Real Madrid thiampuipa Cristiano Ronaldo chuan Champions League nomawi an chawi phawt chuan an tan season duhawm tak a la nih theih thu a sawi.
Real Madrid hi Leganes chuan Copa del Rey quarterfinal aṭangin an pet chhuak a, La Liga lamah lah hmahruaitu Barcelona chu point 19-in an phak lo mek – Real hian zanin dar 8:45-ah team ṭha Valencia an lenchilh dawn a, hnehna chang thei pawh ni se champion beisei ngam chi niin a lang tawh lo.
Ronaldo chuan, “La Liga-ah bul kan ṭan ṭha lo em em a, keini pawh kan lunghnur a ni. Tunah chuan Champions League tan rim takin kan thawk dawn a, hei hi kan tan chuan nomawi hlu ber chu a ni. Season tawpah he nomawi hi kan chawi theih chuan kan tan chuan kum duhawm tak a ni tihna a ni ang,” tiin hlim taka season an la mangṭha theih thu a sawi.
Hetihrual hian Ronaldo chuan beidawng mai thei an la nih loh thu sawiin, “La Liga-ah chuan a harsa tawh dawn tih a chiang a, mah se beidawng tur erawh kan la ni chuang lo. Point tam tak kan hloh tawh a ni mai thei a, mah se rim taka kan thawh chhunzawm zel a ṭul a ni,” a ti.
Real ang thoa Spanish Cup aṭanga petchhuah ni tawh Atletico Madrid chuan Pathianni zan dar 8:45-ah hian league match an khel ve dawn bawk a, Las Palmas an mikhual ang.