Real Madrid defender Marcelo chuan, “Kan pil mek ni berin ka hria,” a ti a, hei hian chiang takin Real dinhmun a hrilhfiah – European champion hian Inrinni zan khan an mikhual Villarreal chu 1-0 in an ngam lo a, Santiago Bernabeu-a Villarreal-in hnehna an chan hmasak ber a ni.
Santiago Bernabeu inkhela goal awmchhun hi Pablo Fornals khung a ni a, goal mawi bik a ni. Real tan Gareth Bale a goal khung chu offside vangin pawm a ni lo a, Cristiano Ronaldo chuan freekick aṭangin pet luhna remchang nei mah se keeper Sergio Asenjo chuan ṭha zetin a lo dang hman.
Goal mawi
Hun tawp nan minute thum chauh a awm tawh tihin Villarreal-in goal an khung a, chak tum Real-in corner an hmuh hnuah counter attack hmangin Yellow Submarine (Villarreal sawina) hian an nawr let thut a, Spanish champion-in hei hi an dawl lo – Real duh loh hnu Denis Cheryshev chuan a khelmual hriatchianah ṭha zeta ball a tlanluhpui hnuin Enes Unal tan a siamsak a, hei hi Keylor Navas chuan ṭha zetin lo dang mah se Fornals-a’n mawi zetin a lo chip khum a, Real tan si phurh sut turin hun a awm tawh lo.
Ronaldo-a’n tun season-ah league goal li chiah a la khung a, Villarreal lakah pawh vawi tam hun ṭha nei mah se a pawimawh ber goal a khung thei tlat lo – Portuguese forward vanduai zanah pawh a chhiar theih. First half-ah penalty hlawhchhuah ngeina tur nia ngaih a nei a, mah se referee-in ngaihdan dang a neih avangin Real leh Ronaldo vanduai ti kaltluangtu chauh a ni.
Real an ral?
Pathianni zan La Liga inkhel dangah Atletico Madrid chuan Kevin Gameiro goal khung hmangin Eibar chu 1-0 in an hneh a, Valencia-in Goncalo Guedes leh Rodrigo goal khung hmangin 2-1 in Deportivo La Coruna an hneh ve bawk. Real hian an chunga awm pathum zingah Atletico chu point 10-in an phak lo mek a, Valencia an phak lohna pawh point riat lai a ni ta – nizana Barcelona result kan hre hman lo a, hnehna an chang a nih chuan point 19-in an thlau tawh ang!
Real tana kum 11 khel tawh defender Marcelo chuan, “He hmuna ka awm hnuah tun hi kan boruak ṭhat loh lai ber a ni. Ṭha taka khelh a, goal khung ngei kan tum a, mah se kan vannei ngang lo a ni. Pawn lam aṭanga in hmuh dan ang hi engkim a dik vek a, kan lunghnur a, kan thinrim a, kan pil mek ni berin kan hria,” a ti.
Zidane a beidawng lo
Zinedine Zidane-a’n Real-ah kum hnih a cham chhungin Champions League nomawi pahnih leh La Liga nomawi a nei tawh a, tun season-ah erawh an talbuai mek – French manager hi a la beidawng duh lo thung. Zidane chuan, “Chak loh hi kan phu lo a ni. Kan khel ṭha em em a, mah se ball kha goal-ah a lut duh tlat lo. Sawifiah dan pawh ka thiam lo. Kan result avangin kan lunghnur takzet a, mah se Ningania Leganes kan lenchilh hunah kan insiamṭha lehnghal ang,” a ti.
Real hian goal khung tumin shot 28 an nei a, tun season La Liga-ah match khata heti zat shot nei thei hi an la awm ngai lo. Zidane chuan, “Kan rilru puthmang pawh a ni mai thei. Result a ṭhat hleihtheih loh chuan hnualna tur hi tam tak a awm ve a, target-ah pet ṭhin mah ila a lut lo a, an dan per pawn ball perna zawnah kan lo awm lo a, hetianga vanduai lututk chuan a hnual ve ruih theih a ni. Hnehna chan ngei tumin kan tih theih ang zawng zawng kan ti a, ka player-te bula sawi leh tur pawh a awm tawh chuang lo. Ka hlim lo a, mah se tlawm rilru ka pu lo,” tiin thawh leh ngei a tum.
credit vanglaini