Barcelona midfielder Arda Turan chuan Turkey lam hawiin Istanbul Basaksehir chu loan-in a zawm a, a loan hun chhung hi kum hnih leh a chanve atan niin Barca-a a contract neihlai chu Turkish club-ah hian a hmang zo hman dawn tihna a ni.
Turan hian July 2015 khan Atletico Madrid aṭangin Barca hi a pan a, a man zat hi pound maktaduai 24 a ni. Mahse, hetihlai hian Catalan club hi player thar lalut thei lo tura thla 14 chhung atana hrem an nih lai a ni a, Turan hian a club thar tana a match hmasa ber khel turin kum 2016 a nghah thlen a ngai a ni.
Kum 30 mi midfielder hi Barca tan a inlan theih hnuah pawh beisei angin hmun pawimawh a chang phak lo a, nomawi paruk erawh chawi hman thoin match 55-a inlan sakah goal 15 a khung.
Basaksehir president Goksel Gumusdag chuan, “Arda chu serthlum rawng jersey ha turin ama ramah ngei a lo kir leh ta a, he transfer hi Basaksehir tana transfer mai a ni lo a, Turkey tana transfer a ni,” tiin an ram legend an hruai let thei chu Turkish football tan pawh hlawkna a nih tur thu a sawi.
credit vanglaini