Your Daily News

INKHEL TURIN DEMBELE A INPEIH

0 787

Barcelona chuan tunkar tawpa La Liga an khelh hunah an duh a nih chuan Ousmane Dembele an chhawr thei tawh ang. Ningani khan Dembele hian team training a zawm pumhlum thei tawh – Pathianni zana Deportivo La Coruna a hmachhawn lo a nih pawhin December 23-a Real Madrid nen El Clasico an khelh hunah chuan a inlan ngei tawh ang.

France rawlthar duhawm Dembele hian nipui bazar hunlai khan Bundesliga club Borussia Dortmund aṭangin pound maktaduai 135.5 zetin Catalan club hi a zawm. September thla khan a malpui a hliam a, kum 20 mi hian a club thar tan hian league match hnih bak a la khel hman lo a ni.

Barcelona tan chanchin lawmawm dang a awm, khawvel player manto pahnihna Dembele bakah hian Rafinha, Andres Iniesta leh Javier Mascherano te pawhin training an zawm vek tawh a, goalkeeper Marc-Andre ter Stegen erawh mimala training pek a la nih avangin tunkar tawpah chuan a inlan a la beiseiawm loh.

Player inhliam vangin buai ve deuh ṭhin mah se Barcelona hian La Liga season kal laiah anmahni khing zotu an tawng lo, point 39 hmuin goal 38 an khung tawh a, an mahni lamah goal sarih chiah a la lut – Neymar awm loh a langsar viau dawn nia ngaitute ngaihdan an thlak chiang hle.

Pathianni zanah Deportivo La Coruna an hneh a nih chuan Real Madrid aiin point 11 zetin an sang fal dawn a, Ernesto Valverde naute hian El Clasico khelh hunah inrintawkna an nei sang thei ang. Champion lai Real Madrid hi Club World Cup khelin an zin chhuak mek a ni.

Credit, vanglaini

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!