FA Cup champion lai Arsenal chu Championship club Nottingham Forest 4-2 a hneh loin third round paltlang zo loin an tla. Arsene Wenger-a nauten tun hnai kum nga chhunga vawi li champion thei nih an tumna chu City Ground-ah tih tawpin a awm.
Premier League team ṭha paruk zingah Arsenal chiah hi third round paltlang zo lo awmchhun an ni a, Chelsea chuan replay khelh an ngai thung. Nizan khan fourth round inkhel tur pawh a ni a, he thu buatsaih lai hian kan hre hman lo.
Penalty vawi hnih
Pathianni zan inkhelah mualneitu lam tan Eric Lichaj-a’n hnai tak aṭanga tauh lutin mikhual team a barakhaih. Arsenal-in captain Per Mertesacker hmangin sut ve mah se chawlhlawk hma chiahin Lichaj bawkin a team hma a hruai pui.
Manager lailawk Gary Brazil kaihhruaina hnuaia khel Nottingham bawkin second half-ah penalty aṭangin an goal thumna an khung a, striker Danny Welbeck-a’n khung ve bawk mah se hun tawp hma deuhin Kieran Dowell chuan penalty aṭang bawkin goal a khung leh.
FA Cup champion hnem ber Arsenal (13 titles) hi kum 1996 hnua a vawi khat nan third round paltlang zo loin an tla a, vawi sarih a champion tawhna tournament-ah Arsene Wenger a mualpho. Premier League club lian dang Chelsea leh Liverpool ten FA Cup nomawi an chawi zat leh Wenger-a’n Gunners a hawhtlinpuina hi a inzat.
Arsenal an zuih
Tun hnai an match hnuhnung pahnihah Arsenal hian penalty an chawi ve ve a, manager Arsene Wenger-a’n referee a sawisel avangin Football Association chuan match thum chhung a naute enkawl thei loin an hrem.
Gunners manager Wenger hian Nilaini zana Chelsea nen League Cup semifinal an khelh tur hre ranin a player a siksawi, league match-a Blues nen an inhnehtawk ṭuma player pakua ngawt a awltir.
Mertesacker leh Welbeck te goal khung zanah an tlarhnung a pawp a, Nottingham Forest lamin ball chang tlem zawk mah se goal khung tumin vawi 12 an pet thei, heng zinga pakua chu goal zawnah a kal thei. Arsenal hian goal zawnah vawi li chiah an pet theih bakah an vanduaina belhchhah turin penalty vawi hnih an chawi bawk.
Arsenal manager Wenger chuan, “Mipui ṭhutna aṭanga mahni team chak lo lai thlir chu thil hrehawm tak a ni. Forest team kha an khel ṭha hle a, an huaisenin an thil tumah an chiang bawk, khatiang team hneh kha chu a harsa a ni” a ti. Wenger hian player thlan chungchang chu an chak lo ṭuma sawiselna an tawh ṭhin pangngai a nih thu leh, goal an chhuah dana an tihsual ang kha match dangah chuan thleng nawn tawh lo se a duh thu a sawi bawk.
Brazil-a hnuaia harhna
Nottingham Forest hian kartawpa Sunderland chu si khat faia an hneh loh hnuah an manager Mark Warburton an ban. Table-ah 14-na niin, an league match hnuhnung pasarih aṭanga vawi khat chiah an chak theih avangin Warburton chungah rinna an nghat zui ngam tawh lo a ni.
Academy manager Brazil-a’n team enkawl hna a thawk lailawk a, Thawhṭanni khan Leeds United nen goal awm loa an inhnehtawk hnuah Arsenal lakah fiahna hautak an hmachhawn zui. FA Cup vawi hnih champion tawh Forest hi goal hmaah an hlauhawm a, minute 90 chhungin ball chang tlem zawk mah se an thawkrimin chak zawk nih phu khawpin an khel.
Forest manager lailawk Gary Brazil chuan, “A nihna tak thlir chuan kan player an inthlau a, mahse hnehna kan chang thei a ni tih chu ka infuihna a ni. Kan club tan chuan chanchin lawmawm inziah belhna ni, ka hmuh dan hi a sir deuh a ni mai thei, kei chuan chak kan phu zawk hleah ka ngai,” tiin Arsenal aia an khelh ṭhat thu a sawi.
credit, vanglaini
Login to comment
No Comments