Premier League champion Chelsea striker hlui Diego Costa chu a club hmasa Atletico Madrid-ah a kir leh ta. Spain international Costa hian nikum September thla khan Atletico hi zawm a duh thu a tichiang tawh a, mah se Spanish club hi transfer chungchanga hrem lai an nih avangin January thla an nghah a ṭul.
Pathianni zan khan Wanda Metropolitano-ah Costa hi pholan a ni a, kartir lam khan training a nei nghal. Tualchhung thuthar thehdarhtute chuan Costa training lai hi fans 20,000 chuang zetin an en niin an sawi.
Kum 29 mi Costa chuan, “Ka hun hmasa aia khan ka ṭha tawh zawk ang, inbuatsaihna ka nei ṭha a, kan team hi hnehna chanpui tur leh goal khung turin ka inpeih tawh,” a ti.
Costa hian kum 2014 khan Atletico aṭangin Chelsea a zawm a, Blues tan hian match 120 khelin goal 59 a khung. London club-in Premier League nomawi pahnih bakah League Cup an chawi theihna turin player pawimawh nimahse a nungchang mawi lo vangin buaina a nei fo a, Stamford Bridge aṭangin chhuak nghal lo mah se nipui transfer hnuah English club tan hian a inlan tawh lo.