A Bialpa Hmuh Tumin A Fanu Kum (3) Mi Chu Amah Chauhin Inah Ni 8 Chhung Kalsanin Rilṭamin A Thi
Japan hmeichhe naupang kum (3) mi chu a nuiin inah ni 8 chaung zet kalsanin a thi tih hriat a ni. Hmeichhe naupang nu bialpa hi an khua atanga mel 600 a hla a awm niin a fanu chu a bialpa a hmuh duh avangin amah chauhin hun rei tak a kalsana riltamin a thih phah ta a ni.
Saki Kakehashi kum (24) a upa chuan Police-te a hrilh danin a fanu Noa kum (3) a upa chu tianga riltam leh tuihala a awm a ring pha lo tih sawiin a fanu mahni chauha ina a kalsan chu engmah harsat awm lo turah a ngai tih a sawi a ni. Kekahashi bialpa hi a awmna a hla ang reng hlea, a bialpa hmu tura a kalchhuah lai hian a fanu, Noa kum 3 mi chu Ota Ward City ah ni 8 lai thangbosanin a thih phah ta tih The Japan Times chuan a tarlang.
Kakehashi, Noa nu hian bialpa neiin a bialpa chu Chhim tawp, Kyushu Island, Kagoshima Prefecture ah khawsain amah hmu turin mel 600 zet a thui a kal tih hriat a ni. Tokyo atangin he a bialpa awmna thliarkar hi thlawhnain darkar 2 kal a ni.
Kekahashi hi hun rei tak a bialpa bula a awm hnuah June 13, Thawhlehni khan lo let lehin a fanu chu thiin a hmu ta a ni. Emergency lam chu rang taka kohin a fanu a thawk tawh loh thu a hrilha . Police-ten man nghalin thil thlendan an chhui zui mek a ni.
Autopsy atanga a lan danin Noa hi tihduhdah thin niin a pumpui pawh a ruak tih thulakna chuan The Times a hrilh. He naupang hi a nuin damlo anga sawiin damdawi lama enkawlna erawh a pe ngai lo tih an sawia, a thihdanah hian thil diklo a awm ngei niin police-te chuan an tarlang bawk.
