VIJAY SANKESHWAR
(Truck pakhat hmanga transport business luhchilh a, India rama transport company lian ber neitu a insiam thei)
Kum 19 mi chauh a nih lai a Truck pakhat hmanga transport business kalpui a tum lai khan Vijay Sankeshwar-a pa khan a fapa Vijay chu India ram a transport business lian ber neitu a la ni dawn a ni tih a hre lawk kher lo ang. Amah pawhin a inring lawk kher awm lo e.
Mahse, he Vijay Sankeshwar, kum 1976 a truck pakhat chauh hmanga Vijay transport din a, transport business luhchilhtu chu tunah chuan VRL Logistics Limited-ah Chief Managing Director a ni tawh a. A company hlutna pawh cheng vbch. 1800 vel zet niin lirthei 4300 chuang a nei mek a. Heng zingah hian truck 3900 leh bus 400 rual an tel a. India rama commercial vehicle nei ngah ber an ni.
Engtin nge a tih bik?
“Risk sang tak ka la ve takzet a ni. A tir lamah chuan hlawkna nei lovin, a chang phei chuan hloh changte pawh ka nei a. Ka nu leh pate bakah ka nupui ngei pawhin kan chhungkaw sumdawnna pangngai, publishing lama kir leh turin min tur reng thin” a ti. Mahse, a beidawng duh teuh lo! A kawng zawh a thlak duh hauh lo! Hmuh a nei tawh tlat…
“Tualchhung sumdawng lian, transport business kum 4/5 lo luhchilh tawhte pawhin ka thutlukna kalh zawng hlirin thurawn min pe thin a. He sumdawnna kawng hi an lo hriatchian tawh lutuk vang emaw, elpui thar neih an duh loh vang emaw a ni maithei”
“Risk ka lak ngam loh chuan engtikah mah hlawhtlinni hmel ka hmu dawn si lo” a ti.
Kum 16 mi chauh a nihin, kum 1966 khan a pa hian a pualin Printing Press a pe a, Vijay Printing Press vuahin, rim takin hna a thawk thin a. Ni khatah darkar 12-14-te hna a thawk thin. He a press-ah hian khawl pakhat leh hnathawktu pahnih a nei ve ran a ni.
Kum 19 a lo nih chuan khawl thar leiin a sumdawnna a ti changtlung a, cheng nuai 2 vel invest a sumdawnna thar tanna tur dang a hisap leh ta bawk a, tuna a hlawhtlinpui tak ber transport business hi a luhchilh ta a ni.
Hetiang a nih avang hian college pangngaiah zirna a chhunzawm thei lo a. Amaherawhchu, zirna chu thlahthlam mai lovin, a hnu deuhah Karnataka University, Dharwad atangin Commerce-ah open-in a graduate ve ta hram a ni.
“Transport business ka luhchilh chiah chu tha min tihpui lotu ka ngah khawp a. Thianthate mai bakah chhungte thlengin min duhpui lo a. Tunhma a min duhsak thintute kha hmelmaah an chang zo ta vek emaw ka ti hial thin” a ti.
Transport Business a luhchilh atanga kum 3-naah truck pakhat a lei belh a, truck dang hire belh bawkin hmalam a pan ta zel a ni.
Credit;Hillsgate