Kerala state a khawsa nupa tuak Bhagaval Singh leh a nupui Laila Singh te chuan hmeichhe 2 thatin an sa an chansawm hnuah an tar har nan leh an vanglai hun an hman rei theih nan tiin an sa an ei tih report chuan a tarlang.

Police te sawidanin, nupa tuak te bakah tualthahnaa inhnamhnawih ve pa pakhat Rasheed alias Muhammed Shafi te hian, an hmeichhe that 2 ruang chu an chansawm a, sakhaw serh leh sang kaihhnawiah an hlan bakah an sa an ei zui bawk niin an sawi.
Hei bakah hian, nupa tuakte ngaihdanah, hmeichhe 2 an thah avang leh serh leh sang thila an hlan avang hian sum leh pai an zawnna kawngah pawh an hmuingil an ring a ni.

An hmeichhe thah hmasa zawk hi June thla liam ta khan a bo thu report a ni a, a hnuhnung zawk hi September thlaah a bo thung. Police ten hmeichhe 2 te hi an zawn mek laiin, tunkar tir lam khan Bhagaval Singh te chenna inah an taksa peng thenkhat an hmuchhuak a, thil awmdan an chhui chhuak ta thei ta a ni. An mi thah te hi Padmam kum 57 mi leh Rosili kum 49 mi te an ni.
Shafi chuan nupa tuakte hnenah, hmeichhe 2 an tihhlum sa chu ei turin a hrilh a, hei hian an taksa chu thalai taksa ang maiin a siam tha leh dawn tiin an nupa chuan tualthat turin a lo fuihpawrh tih an sawi a ni.

Shafi hian Facebook kaltlangin sum leh pai lama pachhiate a melh kual reng a, Bhavagal leh a nupui chu tawng fuhin tual hial an thah phah ta a ni.