Your Daily News

TUIRIAL HEP HI PM-IN HAWN A CHUH KHAWPA CHHUANAWM A NI-CM HAWLA

0 1,000

Chief minister Lal Thanhawla chuan, Tuirial Hydro Electric Power Project chu prime minister Narendra Modi-a’n hawn a chuh khawpa thil chhuanawm a nih thu a sawi.

Lal Thanhawla hian nimin khan Congress Bhavan-ah thu sawiin, Tuirial HEP chu MNF-in an sorkar laia a tihchhiat lailet der thu sawiin, “A man awm loa power megawatt 60 Mizoramin kan hman theih tur hi kuttling loa sum lak duhna vanga tihchhiat vek a nih hnuah chhit theihin Congress sorkarin a siam leh a. Hetianga Prime Minister-in hawn a hauh tlat hi state dangah a awm ang em? PM-in hawn a chuh tlat khawpa thil chhuanawm a ni,” a ti.

Tuirial HEP lungphûm phûm a nih ṭumin, a thawktu turte’n Tuivai lui pawh khuah an tiam nia sawiin CM Hawla chuan, “Kum 1998 inthlan khan Congress sorkar tla lo se Mizoramin power megawatt 270 kan nei tawh ang,” a ti a; MNF sorkar lo se chuan Mizoramin tun dinhmuna kawlphetha a mamawh megawatt 100 vel bakah, hralh tur megawatt 170 a neih tur thu a sawi.

Chief Minister chuan, PM-in mi thawh chhuah hnua párvul tum lo a, Mizoram a thawh chhuahsak tur a ngaihtuah tih sawiin, “Tuirini hi megawatt 42 pe chhuak thei a ni a, hetiang pe chhuak tura kan khuah dawn chuan sorkar laipui lamah dil a ngai a, hun a duh rei dawn. Chuvangin, state thuneihna chin megawatt 25 pe chhuak thei tura kalpui kan tum. Hemi atana sum mamawh hi PM hi min tumsakin, an thawh ṭhat hawn tur lo siam se ka duh,” a ti.

PM Modi chu vawiina Mizoram a rawn tlawh hunah hrilh tur an ngah tih sawiin Chief Minister chuan, “Sorkar laipui aiin Mizoram sorkarin kan ti ṭha zawk daih tih kan hrilh dawn. GSDP-ah pawh sorkar laipui aiin kan sang a, he tehna hi state siam ni loin, NITI Aayog siam a ni. Per capita income-ah pawh kum 2015-16 khan sorkar laipui chu Rs. 93,293 a nih laiin, Mizoram chu Rs. 95,317 a ni,” a ti a; Mizoram GSDP sanna chu mithiamte’n a san zel an beisei thu a sawi.

Credit, Vanglaini

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!