Your Daily News

Mobile App ah chhiar theih in a awm e

Sorkar ding lai chawlhtir tumna A kal na tawh hle – ZPM Gen.Secy.

0 90

Ṭangrual pawl, Zoram Peoples’ Movement (ZPM) chuan an pisa chu kum 2018 atan nimin khan an hawng a, ZPM chairman Lalliansawta’n kaihruaiin, Salvation Army officer Commissioner Lalkiamlova’n hunserh a hmang. Thusawitu K Sapdanga, ZPM general secretary chuan, sorkar ding lai chawlhtir tumna chu a kal na tawh hle niin a sawi.

K Sapdanga chuan, neutral mipui zingah chauh pawh ni lo, neutral lo zingah pawh politics thlir dan thar a piang mek nia sawiin, “Party bilin a vil beh tlat sorkar chu a siamtute ngei pawhin ṭha an ti tawh lo. Mi zawng zawngin an ta neih theih tur sorkar kalphung thar piang ve tawh se tih duhtu an tam tial tial tih a lang mek a ni,” a ti a; party pakhatin sorkar term hnihna a chelh tawp dawn apianga thil thleng ṭhin chu kuminah a thleng mek tih a sawi.

ZPM General Secretary chuan, neutral mipui, ruh vak loa party-a tel ve hram hramte pawhin an bûk tur chu a chiang tawh nia sawiin, “Sorkar ding lai chawlhtir tumna a kal na laklawh tawh a, vote thlak dawn hnaiha MPF feh lohna mual hrût a, pawisa sem den dena chelh din rual a ni tawh lo,” a ti.

K Sapdanga chuan, “Mipui sûkthlêk tur nia lang chu – sorkar ding lai thlakna tur hian kum 10 kan lo hrawn tawh, kan lo chawlhtir tawhte kha koh kir leh tur nge, tha thar, ngaihdan thar hmangin he ram hi mipuiin kan enkawl ve tawh dawn, tih kan buk dawn a ni,” a ti a; ZPM chu mipuiin an la hnâwl loh an nih thu a sawi.

ZPM Gen.Secretary chuan, ZPM chu Mizoram mipuite’n an duh duha an hman atan mipui kutah an tlu lut dawn tih sawiin, “Hman tlaka min ngaih chuan hmanruaah min hmang ang a, hman tlaka min ngaih loh chuan min hnâwl mai ang,” a ti. Inthlan a hnai tial tial a, serh leh sâng a tlem tial tial dawn tih sawiin, “Kan khingpuite nen hmachhuan tur kan nei tam hlei dawn a, an hmanrua ang hman ve kher kan tum lo,” a ti a; Pathian duh loh zawng taka vote zawngtute vangin intih lungngaih an tum loh thu a sawi a ni.

Hunserh hmangtu Com. Lalkiamlova chuan, Mizoramin ram hmangaihtu tam tak a lo nei tawh ṭhin tih sawiin, “Mahse, ram an hmangaih dan chu anmahni ram an hmangaih a, mipui an hmangaih tak tak lo ṭhin. Ram hmangaihtu chu ram mipui hmangaihtute an ni,” a ti a; Mizoramin ram chhana dái theu turin ZPM a mamawh thu a sawi.

Com. Lalkiamlova chuan, Mizorama sorkarna chelh tawhte’n ram kan enkawl dan chu a chhe hle nia sawiin, kawngpui dung ramte chu a mamawhtu ni lo mi hausate ram a ni deuh vek tawh tih a sawi a, “Kan ram hi kan venhim loh chuan kut hnathawktute hi mi hausa rama inhlawhna an zawn hun a la thleng dawn,” a ti. Tlangram lo neih chu tihtawp theih a la ni lo a, tihhmasawn dan ngaihtuah a ngai zawk tih sawiin, “Tunah hian leilet aiin tlangram lo neih hi kan fairèl bêl a la ni zawk a, tlangram lo neih hi ngaihthah theih a ni lo,” a ti bawk.

 

credit, Vanglaini

Leave A Reply

Your email address will not be published.

This site uses Akismet to reduce spam. Learn how your comment data is processed.

WP Facebook Auto Publish Powered By : XYZScripts.com