Media watchdog chuan kar kaltaa Reuters journalist pahnih mante chu chhuah turin Myanmar sorkar a nawr.
December 12 khan Reuter journalist – Wa Lone leh Kyaw Soe OO te chu Yangon khawpui pawnah police officer-te nen zanriah eiho tura sawm an ni a, hemi hnu hian man an ni zui ta a ni. Myanmar Ministry of Information chuan Rakhine state leh security force kaihhnawih thil document pawimawh an kawl vanga man niin a sawi.
Journalist pahnih mante hi Myanmar ram mi ve ve an ni a, kar kaltaa man ni mah se Thawhṭanni thleng khan khawi hmunah nge dah an nih sawilan a la ni lo. Information ministry chuan an thlalak, handcuff bun chunga an ding lai a tichhuak a, Official Secrets Act hnuaiah chhui chian mek an nih thu sawiin, thiam loh chantir an nih chuan kum 14 thleng lung-in tantir theih an ni ang.