Your Daily News

Mobile App ah chhiar theih in a awm e

Ram pumah Republic Day lawm

0 138

Nimin khan ram pumah Republic Day vawi 69-na lawm a ni a, a lawmpuina pui ber New Delhi-ah chuan parade leh show ropui taka neih a ni.

New Delhi-a Republic Day lawmna, Rajpath-ah chuan ASEAN ram hruaitu 10-te chu khuallian an ni. Kum 1950 aṭang khan India hian Republic Day lawmnaa khuallian tur hian ramdang hruaitu a sawm ṭhin a, mahse  kumin hi Republic Day-a khuallian 10 an awm ṭum khatna a ni.  Kumina khualliante hi – Sultan of Brunei Sutlan Hassanal Bolkiah, Cambodia Prime Minister Hun Sen, Philippines President Rodrigo Duterte, Indonesia President Joki Widodo, Malaysia Prime Minister Najib Razak, Vietnam Prime Miister Nguyen Xuan Phuc, Singapore President Halima Yacob, Myanmar State Counsellor Aung San Suu Kyi, Thailand Prime Minister Prayuth Chan-Ocha leh Laos Prime Minister Thongloun Sisoulith-te an ni.

President Ram Nath Kovind chuan hnam puanzar pawtpharhin parade-te chibai bukna a lo chhang a ni. R-Day parade hi Parade Commander Lt. Gen. Aist Mistry-an a kaihruai a ni.

Prime Minister Narendra Modi chuan parade ṭan hmain, India Gate-a Amar Jawan Jyoti-ah ram tana nunna hlantu, sipai thite zahna pangpar a dah.

Republic Day lawmna pual hian ralthuam hrang hrangte pholan anih bakah tableaux 23 lantir a ni a, All India Radio pawh a ṭum khatna atan a tel a, Prime Minister Modi-an thla tina radio programme a hman ṭhin, ‘Mann Ki Baat’ chungchang an pholang a ni.  Income Tax India department chuan Operation Clean Money scheme chungchang a rawn pholang bawk. Mount Abu Public School zirlai 155-te chuan ‘One Vision One Identity and One Community’ tih thupui hmanga ASEAN-India Dialogue Partnership kum 25-na pualin lam an entir bawk a ni.

Nimina ralthuam pholan zingah hian Akash weapon system, counter-battery radar SWATHI leh Brahmo missile system bakah T90 Bishma vehicle pawh a tel. India airforce tableau chu hmeichhe officer pathum, Lt. Chanda, Lt. Aditi Bali leh Lt. Amandeep Kaur-ten an rawn ho a ni. DRDO chuan subsonic cruise missile, Nirbhaya a rawn pholang bawk.

Delhi-a Republic Day lawmna atan venhimna lam pawh khauh taka kalpui a ni, Delhi Police-te chuan Rajpath, India Gate, Red Ford leh kawngpui pawimawhahte  CCTV camera 600 chuang zet an dah a ni. Heng camera-te hi open tender hmanga hawh a ni a, a hawhna man atan hian cheng vaibelchhe nga vel sen a ni.

Republic Day pual hian kum danga tih ṭhin dan angin, Bangladesh ramri-a duty, India leh Bangladesh sipaite chuan sweet an inpe tawn a ni. Hetih lai hian Pakistan ramri-ah erawh chuan Pakistan sipaiten ramri-a inkahhai puan palzuta silai an hmehpuah avanga sipai leh civil mi eng emaw zat an thih vangin Border Security Force (BSF)-te chuan sweet inthleng tawn an duh lo. Pakistan sipaite silai hmehpuah avang hian Jammu and Kashmir-a International Border (IB) leh Line of Control (LoC)-ah chuan ram pahnih sipaite inkar boruak hi a ṭha lo hle.

Leave A Reply

Your email address will not be published.

This site uses Akismet to reduce spam. Learn how your comment data is processed.

WP Facebook Auto Publish Powered By : XYZScripts.com