Your Daily News

Online Class-ah A Zirlai Naupangte A Hmel Hmu Vek Tura A Ngen Hnuah Vanduaithlak Takin A Thi Thut!

0 916

Kerala, kasargod district, Adotukkaya primary sikula Mathematics zirtirtu nu pakhat chu Online class a neih mek laiin a zirlai naupangte hmuh lai ngeiin a boral thut tih an sawi.

Mathematics zirtirtu nu Madhavi hi Government Lower Primary School a thawk lai a ni a, Online class a neih lai pawh hian naupangte hriatah a damsam vak lo tih a sawilang nghe nghe a, a zirlai naupangte chu Camera on a, a hmel en vek tura a ngen zo chu lungphuchawlin a thi thut tih an sawi.

He thil duhawm lo tak hi Ningani liam ta a thleng niin, zirtirtu Madhavi hian a phone kaltlangin Class-III zirlai naupangte hnenah Online in Mathematics a zirtir a ni.

A thih hmain Madhavi hian a zirlai naupangte hnenah a mal te tein a hmel hmu turin a ti a, an zavaiin a be kim diai hman tih an sawi. Vanduaithlak taka a thih hma hian Madhavi chuan a zirlai naupangte hnenah Offline class an neih veleh an hmel hmuh leh vek a beisei thute pawh a sawilang nghe nghe a ni.

Teacher Madhavi hi mahni chauha khawsa a nih thu an sawi a, amah hi pasal sun tawh a ni nghe nghe. Naupangte nen an inbiak mek laiin a khuh vak mai a, reivak lo hnuah a thawk buai nghalin a boral zui ta a ni. Thenawm khawvengten a chanchin an hriat veleh rang takin a chenna in atangin damdawi in lamah an tlanpui nghal a, damdawi in an thlen meuh chuan a thi tih puan a ni zui ta a ni.

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!