Your Daily News

NEET Examah Mark 6 Chauh A Hmuh Avangin A Intihlum. A Dik Tak Chuan Mark 590 A Hmu

0 2,515

Madhya Pradesh tleirawl kum 18 mi chu NEET exam-ah mark 6 chauh a hmuh avanga thinrim beidawngin a intihhlum. A exam-na paper an ennawn leh ngata mark 590 a lo hmu renga mahse, a tlai zo ta a ni.

Computer lamah tihsual a awm nge exam endiktuten an tisual zawk tih chu hriat chian a la ni rih lo. Tleirawl Vidhi Suryavanshi chu doctor nih ngei tumin National Eligibility-cum-Entrance Test (NEET) exam a neia, September thla khan he exam hi rampumah buatsaih niin online lamah October 15, 2020 khan result tarchhuah a ni.

Result a han en meuh chuan a hming hmaah mark 6 chauh a han hmu ta mai chu a beidawng ngawih ngawiha, a chhungte chuan theih tawpin an hnem ve nghe nghe. Mahse, nih a tum tak chu thil ni thei ni dawna a hriat loh avanga nun beidawngin ek in chhungah a inawkhlum tih an sawi.

A chhungte chuan a exam-na paper chu thil diklo a awm an rin avangin OMR Sheet chu an en tha leha, Vidhi chuan mark 590 a hmu tih an hrechhuak ta a ni. Police-te pawh lo thleng nghalin a ruang chu damdawi in lamah kalpuiin postmortem an neih hnuah an vuiliam tih an sawi.

Hmanni lawk pawh khan Bihar a mi Vikash Goyal pawh mark 10 chauh hmu angin an tarchhuaka, a hnuah OMR sheet an en tha leha mark 720 ah mark 615 zet a hmu tih an hre leh bawk. Pawi thin hle mai.

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!