Your Daily News

Hmeichhia 17 Zet A Nupui Tur Anga Buma, Sum Rs 6.6 Crore Zet An Hnen Atanga Laksaktu Pa Pakhat Police-ten An Man

0 1,024

Hyderabad Police-te chuan pa pakhat nupui neih chhuanlama hmeichhe 17 zet lo bum kualtu misual an man tih an sawi.

He misual hi Mudavath Srinivas Naik tia koh niin, Andra Pradesh, Prakasam district lam chhuak a nia, Chawlhni liam ta khan Jawahar Nagar, Andra Pradesh-ah an man tih an tarlang.

Police-te sawidanin Naik hian hun rei tak chhung chu Indian Army ah Major hna thawk angin a insawi tih an tarlang. A mi bumte hnenah M Srinivas Chowhan hming pu angin a insawi a, sipai thuam a inbel lai thlalak tam tak a nei bawk.

Naik hian in a luah bawk a, a inluahna chu a office a ni tiin a hmeichhe bumte hnenah a sawi thin a ni. Amah hi Class 9 thleng zir a nia, a nu leh pate hnenah tak ngial pawh thudik sawi tha duh loin Army Officer angin a insawi tih hriat a ni bawk.

Video Conferencing kaltlangin a hmeichhe mamawh zawng leh an chhungte chu bumin, amahah rinna a neihtir hmasa zeta, inhnimhnaih dan kawng chu a dap ta char char mai a ni. Tianga an in hnimhnaih tawh hnu leh amahah rinna an neih tawh hnu chuan inneih chhuanlamin urgent thilah sum a mamawh thut tih sawiin sum a dil ta thin a ni. Hmeichhiate pawhin rinhlelhna chhe te pawh nei loin sum chu an lo pe mai thin a ni.

Police-te sawidanin Naik hian Guntur, District Medical and Health Office a Superintendent hna chelh lai nu pakhat chu nupuiah a nei a, fapa 1 nei tawhin Guntur district, Vinukonda ah an khawsa tih an tarlang.

A chungchang ngaihtuah mek a nih thu police-te chuan an sawi.

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!