Tunlai khawvel thiamna leh finna thang chho mek zelah, mi sang tam tak chuan ei zawn nan an career ah Youtuber nih an thlang mek a, he video-sharing platform hi tangkai taka hmangin ei leh bar hmuh nan an hmang mek a ni.
India ram, Chhatisgarh, Raipur, thingtlang khuaa cheng khaw mipui 30% lai mai chuan YouTube kaltlangin ei an zawng tih hriat niin, khaw mipui 3000 ah 1000 lai chu YouTuber an ni.
He khuaa cheng thiandun 2 Gyaendra Shukla leh Jai Verma te chuan an hna bansanin Youtube Channel an siam a, hun rei a liam hmain Subscribers nuai chuang an hmu hman a ni. Shukla hi SBI ah network engineer a nia, Youtube a thlir fo thin a, a tawpah amah ngeiin video siam a tum ta zawk a ni. A thianpa Jai Verma pawh M.Sc (Chemistry) niin, private couching centre a thawk a ni thung.
Thiandun 2 te hnung zuiin, tualchhung mi engemaw zatin YouTube lamah Channel an siam chhunzawm a, heng mite hian hna dang thawk lovin Youtube atangin sum tam tak an hai lut a ni.
Female artist leh Youtuber Pinky Sahu sawidanin, heng Youtubers te hian hmeichhiate nasa takin an tha an tichak tih a sawi a, kum 1 leh a chanve liam hnuah tualchhung hmeichhiate chuan Channel 40 an siam hman a ti a ni. Mipa angin pawn lama chhuah remchang lutuk lo mah se an Youtube channel kaltlangin hmeichhiaten enge an tih theih tih nasa takin an pholang a ni tih ANI a hrilh.
Tulsi thingtlang khua YouTuber zinga pakhat Sandeep Sahu sawidanin, an khuaa cheng te hi a hmei a pain lemchan lam an hnehsawh hle tih a sawi a, tun hma zawng kha chuan an thiamna leh an theihna te pholan nan hmun an nei lo a ti a, tunah erawh Youtube kaltlangin an theihna te an lantir bakah sum an hlawh chhuak bawk a ti a ni.
