Chawlhni liam ta khan Western India state Gujarat lei chimah mi 68 an thi a, mi dang 30 chuangin hliam na tak an tuar tih hriat a ni. Thuneitute sawidanin, he lei (bridge) hi tuichunga dawh a ni a, mi thahnem tak tuiah hian an tlathla a ni.
Thuneitute sawidanin, he suspension bridge hi Morbi town, Machhu tuipui chunga dawh niin, vanduaithlak tak maiin Chawlhni tlailam khan mi 400 dawnin an zawh laiin a chim ta rup mai a ni.
TV footage atanga a landanin, mi tam tak chu an sa himna zawngin lei chimah hian an inkhai a, emergency team te chuan heng mite hi chhan chhuah tumin theih tawpin hma an la nghal tih thuneitute chuan an sawi. A thente chuan tuipui hi an hleuh chhuak hram tih hriat a ni bawk.
Morbi Senior Official N.K. Muchhar in Reuters a hrilhdanin mi thi te hi hriat theih chinah mi 68 an tling tawh niin a sawi. Hei bakah hian mi 30 chuang hliam tuar an awm bawk a ni.
230 metres a sei he lei hi Kum zabi 19th-na British rorelna hnuaia India a awm laia siam a ni a, thla 6 chhung cheibawl that niin kar hmasa mai khan mipui zawh theih tura hawn leh a ni.
