Sorkar kum kal mek, 2017-18 chhungin Legal Metrology department chuan ei rawngbawlna gas, a bûk tling lo trip 869 an man tawh a; bûkna hmanraw dik lo 7,848 an man tawh bawk.
Legal Metrology hotute sawi danin, gas bûk tling lo an mante hi report an dawn an bawhzui leh sawi lâwk loa an enfiahna aṭanga an mante a ni a; gas an mante chu a neitu agency-te’n dan anga pawisa chawia an khul chhuah ṭhin bakah, a bûk tlin loh dan azirin man tláwm zawkin mipui hnenah hralh chhuahtir leh ṭhin a ni.
Legal Metrology hotute chuan, ei rawngbawlna gas bûk tling lo an man ṭhin chungchangah tun hnai aṭangin kalphung thar an hmang tih an sawi a; gas an mante chu agency-te’n challan nen Indian Oil Corporation-ah an thawntir leh vek ṭhin tih sawiin, an thawn kîr ngei tih finfiah nan challan copy pawh Legal Metrology pisaah an thehlut ṭhin niin an sawi.
Legal Metrology hian dawr leh chawhmeh zawrhnaa bûkna an hmante pawh an endik ṭhin a, sorkar kum kal mek chhung hian bûkna dik lo 7,848 an man tawh. Tehkhâwng dik lo hmangtute chu pawisa an chawitir ṭhin a, bûkna dik lote pawh an siam diksak ṭhin a ni.
credit, vanglaini