Your Daily News

Covid-19 Avanga Thi, A Pa Ruang Hmu Turin A Fapa Hnenah Damdawi Ina Thawkten Sum Rs. 5,1000 An Phut

0 637

India ramah Covid-19 avangin dam lo an pung zela, mi thi pawh an pungchho mek bawk. Hetih lai hian damdawi in hmun tam thenkhata hnathawktute duh khawp lohna leh damlote an enkawl danah lungawihloh hriat tur a thleng nual tawh bawk a ni.

Chhungkaw pakhat chuan damdawi in pakhata an chhungkaw mi Covid-19 avanga thi ta, chhungkaw pa ber ruang hmu turin damdawi ina thawktuten pawisa Rs.51,000 an phut tih an sawi.

India Today in a tarlandanin West Bengal, private damdawi inah Covid-19 avanga thi chhungkaw pa ber chungchang chu darkar tam fe an chhungte an hriattir lo tih sawiin, Inrinni a thi tawh chu Chawlhni tlai lamah call an dawng ve chauh niin a sawi. He thil thleng chungchang hi Sagar Gupta chuan sawi chhuakin a pa, Hari Gupta chu Covid-19 avanga damdawi ina awm chu Inrinni ah a thi tih a sawia, Chawlhni tlailamah damdawi in lam hian phone in an hriattir ve chauh tih a sawi a ni.

Call an dawn hnu chuan Damdawi in lam chu hmanhmawh takin an pan nghala, thuneitute an hmuh hnu chuan mithi chu a ruang hal turin ruang halna hmunah an kalpui tawh tih an sawia, ruang halna hmunah kal lehin mithi ruang hmu turin pawisa Rs.51,000 lai an lo dil tih hriat a ni.

An pawisa chawi tur chu a tam em avangin an inhnialbuai tih an sawia a hnuah Rs.31,000 ah a tlahniam ta a ni.

Thil awmdan police-te hriattir an nih hnuah police officer pakhat chu ruang senghawina hmunah lo thleng ve nghalin damdawi in lama thawk (staff) te chuan an lo be tha peih vak lo niin an sawia, officer chu helai hmun atanga inthiarfihlim tur leh thuneitu sang zawkte nen sawiho an duh thu an lo hrilh tih an sawi.

He thil thleng zawng zawng hi video camera-in lak an tum zeta an phone an chhuhsak tih an sawi bawk. Pawi thin hle mai.

Leave A Reply

Your email address will not be published.

This site uses Akismet to reduce spam. Learn how your comment data is processed.

WP2Social Auto Publish Powered By : XYZScripts.com
error: Content is protected !!