Your Daily News

CM Lal Thanhawla’n PM Modi kaihhruaina hnuaiah Mizoramin hma a sawn a beisei

0 478
CM Lal Thanhawla’n PM Modi kaihhruaina hnuaiah Mizoramin hma a sawn a beisei

Chief minister lal Thanhawla chuan, prime minister Narendra Modi kaihhruaina hnuaiah Mizoramin hmasawnna kawngah nasa taka hma an sawn a beisei thu sawiin, Mizoram mipui nuai 11 vel chauh chu dâwm kân ngai leh ṭanpui ngai an nih thu a sawi.

December 16, Inrinnia Lammuala PM Narendra Modi-a’n Tuirial HEP a hawnna inkhawmah thu sawiin CM Lal Thanhawla chuan, Prime Minister-in Mizoram a rawn tlawh chu lawm­awm a tih thu a sawi a; PM Modi-a kaihhruai­na hnuaia hmarchhak state hrang hrang leh Mizoramin hmasawnna kawng­ah nasa taka hma an sawn a beisei thu sawiin, Mizoram mamawh hrang hrangte a sawi a ni.

Lal Thanhawla chuan, Mizorama inkalpawhna kawng hrang hrang, national highway, state highway leh khaw kar kawng siam nante sum tam tak mamawh a nih thu te, Mizoram chu ruahtui tlak tamna ram a nih avangin kawng enkawlna atana sum mamawh a san bik thu te, Mizoram mipui zuingah Hindi a lar theih nan CSS hnuaia Hindi zirtirtu kum 10 chhung tal rawih chhunzawm leh a ṭul thute a sawi.

Chief Minister chuan, kum 1986-a India sorkar leh MNF remna thuthlung siam tawh chu chhin­chhiah tlak a nih thu sawiin, “India rama inremna hlawhtling ber a ni a, Mizoram hi state rálmuang ber a ni,” a ti. Faina leh thianghlimna kawngah Mizoram sorkar­in tun hma aṭangin ṭan a lo lak tawh thu leh PM Modi hmalaknaa Swachh Bharat kalpui chu ṭha a tih thu sawiin, sorkar laipuiin êk-in ni lo, páwn lama inthiar awm lohna tura ṭan a lakna chu Mizoramah tihpuitlin thuai a beisei thu a sawi bawk.

CM Lal Thanhawla chuan, PM Narendra Modi chu lo zin leh thuai turin a sáwm a; a lo zin leh hunah chuan ni hnih/khat tal chám tura inbuatsaih turin a ngen a ni.

Credit,vanglaini

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!