April 3, 2023 liam ta khan India ram Chhatisgarh, Kabirdham district-ah thihna rapthlak tak thlengin, Sarzu Markham kum 33 a upa chuan a bialnu hlui pasal neih lawmpuina thilpek a pekah bomb a phumru a, mopa Hamendra Maravi kum 22 a upa leh a unaupa Rajkumar kum 30 mite chu inneihna hmunah an thi nghal a, mi 4 in hliam na tak an tuar tih hriat a ni.
Police te sawidanin, pawikhawihtu a puh Sarzu Markham leh monu kum 29 mite hi a hmain an lo inngaizawng a mahse, hmeichhe chhungte hian Markham hi sirah hnawlin tuna a pasal thi ta Hamendra nen hian an inneihtir ta zawk a ni.
Tianga monu chhungten an fanu tan Markham chu pasal an tan an duh tak loh avang hian, Markham thinrim chuan a bialnu hlui chu a pasal neih dawnah inneih lawmpuina thilpek a va pe ta a ni.
Police Officers te sawidanin, Markham’an a bialnu hlui inneih lawmpuina atana thilpek a hlan hi Sound System niin, a chhungah Bomb a lo dah khiau mai a, current a luh veleh puak mai thei turin ruahmanna a lo kalpui a ni. He Gift hi inneih ni thlen hma ni 3 ah Markham hian a lo pe daih tawh a ni.
Inneih niah Sound System chu hawngin Current an han luhtir a, a puak nghal thuai mai a, mopa leh a unaupate chu thi nghalin an bulhnaia awm ve mi dang 4 te pawh chuan hliam na tak an tuar a, enkawlna pek an ni.
Times Of India in a tarlandanin, tualthattu a puh Sarzu Markham hi bomb puahna hmun inneihna atanga KM 100 a hla thenawm state Madhya Pradesh-ah Police ten an man tawh nghe nghe. Thil thlendan kimchang chhui zui mek a ni tih thuneitute chuan an tarlang.
