Your Daily News

Mobile App ah chhiar theih in a awm e

US shutdown : Sorkar service ṭhenkhat la chawl chhunzawm

0 246

US-a roreltuten federal funding pek belhna turah inremna an siam theih loh vangin kar kalta Zirtawpni zan aṭang khan sorkar chu hnathawk thei loin an siam.

US senate chuan hei hi tihtawp a nih theih nan theihtawp chhuah mah se nimin thleng khan sorkar hnathawk tam tak chuan an hna an la thawk chhunzawm thei lo. Senate chuan kar kalta kartawp khan special session neiin, hna thawh chhunzawm a nih theih nan hma a la a, mahse Democratic leh Republican senator-te chu inpuh tawnin, inremna an la siam thei lo a ni.

US-ah hian Congress leh President-ten sorkar hnathawhna tur leh agency hrang hrangte tana sum pek tur, legisation funding chu an pass theih loh chuan sorkar hi hnathawk thei loin an siam thei a ni. Funding chungchanga inremna an siam theih loh chuan Antideficiency Act hmangin sorkar chu hnathawk thei loa siam, shutdown a ni thei a ni. Kum 1976 aṭang khan tuna budget kalphung hman a nih hnuah, budget funding-ah a kar awl, extention funding siam ngai ṭum 19 a awm tawh a ni. Kum 2013 khan ni 16 chhung shutdown hi neih a lo ni tawh a, sorkar hnathawkte chawlh tir an ngaih phah a ni. Hei vanga sorkarin sum a hloh hi dollar tluklehdingawn hnih a tling.  Shutdown hi sorkar laipui bakah state, territorial leh local goverment-ah te pawh a awm ṭhin a ni. Democrats lam chuan President Donald Trump hnenah budget deal-ah immigration chungchang sawitel an rawt a, mahse Republican lam chuan goverment service-te khar a nih laiin eng inremna mah siam theih a ni lo an ti thung. Republican lam hian border security atan sum dah an duh a, hei hian Mexico nena an inri-naa daidanna bang siamna tur pawh a tel a, hei bakah hian immigration kalphung siamṭhat leh, sipaite hman tur sum tam zawk dah an duh bawk.

Shutdown tihtawp a nih theih dan ngaituaha vote lak hun tur, nimin zing lama neih tur chu tlai lamah neih turin sawn hlat a ni. Inremna an siam theih loh chuan sorkar laipui hnuaia thawk tam takte chu unpaid leave-a chawlh tir an ni ang.

Senate rules hnuaiah bill pass tur hian chamber member 100 zingah vote 60 tal  hmuh tlin a ngai a ni. Republican hian senator 51 a nei mek a, extension budget pass tur hian Democrats member ṭhenkhatin an thlawp a ngai dawn a ni.

Nimin thleng khan  housing, environment, education leh commerce department hnuaia thawkte chu an la chawl a, treasury, health, defence leh transportation department-a thawk zinga a zahve vel zet pawh an la kal lo bawk. Mahse service ṭhenkhat –  national security, postal services, air traffic control, inpatient medical services, emergency outpatient medicine, disaster assistance, prisons, taxation leh electricity generation-te erawh dan pangngaiin an kal thung.

 

credit, vanglaini

Leave A Reply

Your email address will not be published.

This site uses Akismet to reduce spam. Learn how your comment data is processed.

WP Facebook Auto Publish Powered By : XYZScripts.com