United Nations General Assembly chuan Ningani khan an memner ram hrang hrang vote la in, United States President Donald Trumph-a’n Israel khawpuia Jerusalem a puan chu dan in a pawm loh thu leh awmze nei lo a nih thu an tarlang.
Israel khawpui atana Jerusalem pawm a nih duh lotu hi ram 128-an awm a, ram pakua – US, Israel, Guatemala, Honduras, Marshall Islands, Micronesia, Nauru, Palau leh Togo te chauhin US thutlukna hi an pawm a ni.
UN-ah hian member ram 193 awmin ram 35 chuan an ngaihdan an tarlang lo a, engmah an vote lo ve ve a ni. Hetih lai hian vote thlak tura kal lo ram 21 an awm bawk.
US thutlukna pawm lo tu lamah hian Security Council member dang pali China, France, Russia leh UK te an tel a, anni bakah hian US thurualpui muslim ram ṭhenkhat pawhin hemi chungchangah hian Trumph-a thutlukna hi an pawmpui lo a ni.
Israel PM-in dawt hmunpui tiin UN a puh :
Israel Prime Minister Benjamin Netanyahu chuan United Nations-in US President Trump-a’n Israel khawpuia Jerusalema pawm thu a puanna sut tura phutna, draft resolution a ngaihtuah chungchangah UN chu dawt hmunpui tiin a sawi.
Israel PM chuan Jerusalem chungchanga UN vote lak chu an thlawp loh tu leh, he resolution hi member-ten pawm mah se an pawm ve loh tur thu a sawi. “Jerusalem hi kan khawpui a ni a, kan chei belh zel dawna, foreign embassy-te pawh kan dah zel ang. US chuan hma hruaiin a embassy hi Jerusalem-a a la sawn thuai dawn a, he thil hi a la thleng ngei dawn a ni”, a ti.
US President Donald Trump chuan Israel khawpuiah Jerusalem a pawm thu a puang a, Tel Aviv-a US embassy pawh Jerusalem-a sawn a nih tur thu a sawi. Mahse embassy sawn tur erawh hi chu tun maiah tihfel theih a ni rih lo ang.
credit,vanglaini