Your Daily News

TRUMP-AN PALESTINIAN CHHAWMDAWLNA TIHTAWPAH A VAU

0 527
TRUMP-AN PALESTINIAN CHHAWMDAWLNA TIHTAWPAH VAU

US President Donald Trump chuan thuchhuah siamin Palestinian chuan inremna kawng zawnga inbiakna neih a duh loh avangin US in chhawmdawlna a pek ṭhin chu a tihtawp maithei niin a sawi.

Donald Trump chuan US chuan chhawmdawlna a pek ṭhin chungchangah lawmna emaw, zahna lantirna emaw engmah a dawng let lo a ni, tiin a twitter-ah a tarlang.

Trump chuan Israel khawpui atana Jerusalem a pawm thu a lo puan tawh chuan Israel-Palestinian inremna kawng zawnga inbiakna neih chungchangah Palestinian-ten ngaihdan hrang an neih phah niin a sawi bawk. Palestinian-te chuan Jerusalem khaw pum chu Israel khawpuiah an pawm thei dawn lo tih sawiin, an inkara inremna kawng zawnga hmalatu-ah US chu rin ngam a ni thei tawh dawn lo niin an lo sawi tawh a ni.

US President chuan Palestinian-te chu kumtinin chhawmdawlna tur dollar maktaduai tel an pe ṭhin a, mahse an ṭanpuina pek avang hian Palestinian-te hian an laka lawmna leh zahna engmah an tilang lo a, US-in Israel nena inremna siam tura inbiakna nei tura a duh em em pawh an zawm duh lo a ni, a ti. Palestinian chauh ni lo, ramdang chhawmdawlna an pek ṭhinte pawhin an lakah lawmna engmah an lantir duh lo niin a sawi bawk.

President Trump hian nikum December thla khan Israel khawpui atana Jerusalem a pawm thu hi puang a, hei hi Palestinian bakah ram hrang hrangten an sawisel a ni. US thutlukna siam hi UN General Assembly-ah a demna resolution pu lutin, member ram 128 in resolution thlawp zawngin vote an thlak a ni.

Israel chuan Jerusalem khawpui pum hi a ram khawpuiah a chhal a, mahse Palestinian-te chuan kum 1967 Middle East War laia Israel-in a ram luahsak, East Jerusalem chu Palestinian ram hran a din hunah an ram khawpui atan hman an tum thung a ni.

Khawvelin Israel khawpui atana Tel Aviv an pawm avangin embassy-te pawh Tel Aviv khawpuiah vek an dah a, US embassy pawh a awm a ni. Mahse Trump chuan US embassy pawh hi Jerusalem-a sawn dan tur ngaihtuah a nih tur thu a sawi.

President Trump-an a twitter-a Palestinian chungchang a tarlan hnuah, UN-a US palai Nikki Haley-i chuan Palestinian refugee-te ṭanpuina tura US-in UN relief agency-a sum a pek ṭhin a tihtawp tur thu a sawi ve nghal a ni. UN agency hian Palestinian refugee-te tan hian education, health leh social programme an kalpui a, US chu donor lian ber niin kum 2016 chhung khan agency tan hian dollar maktaduai 370 vel a thawh a ni. US dawta sum thawh hnem, European Union chuan US sum thawh chanve pawh a thawh pha lo a ni. US-in a sum thawh a tihtawp chuan agency hmalakna pawh a nghawng hle rin a ni

 

credi: t vanglaini

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!