Your Daily News

Mobile App ah chhiar theih in a awm e

TRUMP-AN GUANTANAMO CAM HAWN CHHUNZAWM DAWN

0 302

US President Donald Trump chuan Cuba khawchhak lama US naval base-a Guantanamo-a prison camp chu hawn chhunzawm zel a nih tur thu a sawi.

President hlui Barack Obama khan Guantanamo Bay hi khar a nih tur thu a lo sawi tawh a, mahse khar tuma a hmalaknaah a hlawhtling lo a ni.

Donald Trump chuan Congress-ah State of the Union address a neihah, inthlan dawna a lo tiam tawh angin Defence Secretary James Mattis chu military detention policy hi ennawn tura a hriattir thu leh,  Guantanamo Bay-a prison camp pawh hawn chhunzawm tura thupek pawh a ziah thu a sawi.

George W Bush-a president lai khan US sipaite chuan Guantanamo Bay-a prison camp hi hmanhmawh takin an siam a ni. He hmun hi September 11,2001-a firfiakten US an beih avanga US-in Afghanistan-a beihpui a thlak hnuah siam a ni. He hmunah hian firfiak nia rinhlelh mante dah an ni a, a tirah chuan an mi mante hi bawm chhungah khungin a hmun pawh hi razor wire hmanga hung a ni. Tangte hi jumpsuit serthlum rawng haktir an ni a, tang te enkawl leh nghaisak an nih dante chuan sawisel a hlawh fo ṭhin.

Camp X-Ray tia sawi ṭhin hi tunah chuan structure ṭha leh ngelnghet zawka siam a ni tawh a, Guantanamo Bay-ah hian high-security prison building eng emaw zat siam a ni tawh. He hmuna tangte hi an tam lai berin 780 an ni a, tang zinga a tam ber hi Al-Qaida leh Taliban firfiak pawl nena inzawmna neia puha mante a ni. Mahse an zinga tam tak chu tan-in dang leh anamhni ram tan-inah sawn an ni tawh a ni.

Kum 2009-a US President atana lakluh a nih khan Obama chuan kum khat chhungin Guantanamo camp hi khar a nih tur thu a sawi a, kum 2008 aṭang khan tang dah thar pawh an awm tawh lo a ni. Obama’n prison camp khar tuma a hmalakna chu hlawhtling lo mah se, a hun lai hian he hmuna tang 242 awm chu 41-ah an tlahniam hman thung a ni.

Mahse Donald Trump chuan na zawka firfiakte beilet a tumna peng pakhatah, firfiak nia rinhlelh mante dahna turin  Guantanamo camp hi  hawn chhunzawm zel a tum a ni. Trump chuan thupek thar a siam thu a sawi rual hian, a hmain ngaihtuahna seng lo takin firfiak hlauhawm tak tak an lo  man tawh za tel chu an lo chhuahtir a,  heng mite nen bawk hian indonaah an inhmachhawn leh a ni tih a sawi. Hei vang hian firfiakte do let tura a thu lo tiam tawh a tipuitling zel dawn tih a sawi.

credit, vanglaini

Leave A Reply

Your email address will not be published.

This site uses Akismet to reduce spam. Learn how your comment data is processed.

WP Facebook Auto Publish Powered By : XYZScripts.com