Your Daily News

Saudi Arabia-in lal fapa 11 man

0 554

Saudi Arabia sorkar chuan inrenchemna policy kalpui a tumna dodal a, lungawi lohna an lantir avangin lal fapa 11 a man.

Kar kalta Inrinni khan lal fapa 11-te hi an ram khawpui, Riyadh-a al-Halem palace-ah sorkar lal chhungkuate an mamawh leina bill te pe ve tura a tih avangin lungawi lohna lantirin an pungkhawm a ni. Lal fapa-te hian kum 2016-a tualthuah thubuaia thiam loh chantir avanga lal fapa pakhat tihhlum tak chhungte hnenah zangnadawmna pe turin an phut bawk.

Lal fapa-te hi man an nih hnuah Riyadh chhim lamah al-Ha’ir tan-inah dah an ni a, thubuai siamsak an ni ang. Sorkar chuan lal fapa-te man a nih thu thuchhuah siamin a tarlang a, an hming erawh puanzar a ni lo. Sorkar thuchhuah chuan Saudi Arabia ramah tumah dan chunga leng an awm lo a, mitinte chu ang khat leh intluktlang vek an ni a, an chungah pawh ang khat veka ro rel a ni ang, a ti.

Saudi Arabia sorkar hian tunhnaia economic siamṭhatna tur a duang a, heng zingah hian chhiah lakna tur value-added tax (VAT) a tel bakah, lal chhungkaw member-te tui leh electric bill sorkarin a peksak ṭhin pawh a titawp a ni. Kar kalta Inrinni khan King Salman chuan khawsak tihziaawmna tur ruahmanna a siam a, kum thar aṭangin sorkar hnathawkte chu thla tinin bonus dollar 267 pek an ni ang a, Yemen-a sipai an tirhte chu fee dollar 1,330 pek zel an ni bawk ang. Zirlaite hnena allowance pek ṭhin pawh nakkum aṭangin 10% a tihsan a ni dawn bawk.

Oil man tlakhniam avangin nikum khan Saudi Arabia sum dinhmun hi a tlahniam a, hnathawh nei lo pawh 12% in an pung a ni.

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!