South Korea-in inbiak a rawtna chu North Korea chuan a remti ta a, January 9-ah ram pahnihte hian kum hnih chuang hnuah official talk an nei leh dawn a ni. NKorea-in rawtna a pawm hma lawk hian US leh SKorea-te chuan joint military exercise an neih tum pawh an tikhawtlai a ni.
South unification ministry thuchhuah chuan an rawtna siam chu NKorea in a pawm thu leh, January 9-a inbiakna an neih tur thu hi a sawi. Ram pahnihten official talk an neih hnuhnun ber chu kum 2015 December thla kha a ni.
Ram pahnih aiawhten inbiakna an neihna hmun atan hian ramri bula Panmunjon khua ruat a ni a, he hunah hian Pyeonchang Winter Olympics neih tur leh, Korean ram pahnihte inlaichinna chungchang sawiho a ni dawn niin ministry thupuangty Baik Tae-hyun chuan a sawi. Inbiaknaa ram pahnih aiawhtu turte erawh puanzar an la ni lo. Panmunjon hi demilitarised zone (DMZ) a awm niin, ram pahnihte hian inbiakna pawimawh chu he khuaah hian an nei ṭhin.
Japan defence minister Itsunori Onodera chuan Korea ram pahnihte inbiakna neih tur chungchang hi fimkhur a ngai hle niin a sawi a, NKorea chuan a weapon program a chhunzawm zel avangin Japan pawh inralring renga a awm thu a sawi. Minister chuan NKorea chu a hma pawhin inbiakna ṭum eng emaw zatah a lo tel tawh a, mahse hetichung hian nuclear leh missile a siam hna chu a thawk chhunzawm reng tho a ni, a ti.
South Korea President Moon Jae-in chuan Pyeochang-a Winter Olympics neih turah North Korea chu tel ve tura a duh thu a lo sawi fo tawh a, he hun hi ram pahnihte inkar boruak siamṭhatna hun remchang tak nia a ngaih thu a sawi. Olympics hi tluang taka neih a nih theih nan SKorea ngenna angin US pawhin Games neih laia joint military exercise neih tura ruahmanna an lo siam tawh pawh sawn a lo remti a ni. NKorea hian US-SKorea sipaiten joint drill an neih ṭhin hi a ngaimawh hle a, an ram beihna tura an inbuatsaihna nia ngaiin a lo sawisel fo tawh a ni. US Defence Secretary James Mattis chuan drill chu March 19-a Paralympics zawh fel hunah neih a ni dawn tih a sawi.
Credit, vanglaini