North Korea leh South Korea ram aiawhte kum hnih chuang hnua official talk an neih leh hnuah, North Korea chuan South Korea tan military hotline a hawng leh ta.
South Korea sorkar official chuan Thawhlehni-a Panmunjom-a North aiawhte nena inbiakna an neih lai hian, NKorea hian khawthlang lama ramri kaltlanga military hotline siam chu a hawn leh thu a hrilh niin a sawi. South Korea sipaite chuan hei hi finfiah nghalin, an ram huna Thawhlehni tlai dar 2 aṭang khan communication channel hi hman theih a ni tih an sawi.
Military hotline hawn a nih leh tak avangin Korea ram pahnihte sipai hotute chu he channel kaltlang hian an inbepawp leh thei dawn a ni. He communication channel hi kum 2016 February thlaa ram pahnihte inkar boruak chhiat avanga South Korea-in North lam ramri khua, Kaesong-a industrial zone a khar hnuah khan North lam hian an titawp zui a ni. Hetihlai hian khawchhak lam ramri-a military hotline eawh chu kum 2011 khan kangmei chhuakin a tichhia a, siamṭhat a la ni lo.
Korea ram pahnih aiawhte chuan Panmujon khuaa darkar 11 zet inbiakna an neih hnuah thuchhuah inṭawm an siam a, thla thar-a South Korea-a Peyongchang Winter Olympics neih tura North lamin palai tam tam tak tirh a remtih thute pawh an tarlang. Hetihlai hian South lamin Korean peninsula-a nuclear program tihtawp tura inbiakna neih leh a rawt erawh chu North lam hian a sawisel thung.
Ram pahnih official-te chuan an inkar harsatna awmte chinfel dan ngaihtuah inbiakna neih leh an remti a, mahse NKorea chuan inbiakna neih tura hian a nuclear programme kalpui chungchang erawh sawitel a duh lo. North Korea aiawh, Ri Son Gwon chuan, “Kan ralthuam neihte – atomic bomb, hydrogen bomb leh ballistc missile-te hi kan ṭhianṭha leh unau te bakah China leh Russia beihna tura kan tih a ni lo a, US beihna tur chauh a ni”, a ti. Hei chu North leh South Korea-te inkar buaina tur a ni lo a, hemi chungchang sawichhuah chuan an inbiakna lo neih tawh pawh awmze nei loa a chhuah phah a hlauhawm niin a sawi.
creddit, vanglaini