Your Daily News

KOREA RAM PAHNIHTEN INBIAKNA AN NEI TA

0 637

North Korea leh South Korea chuan kum hnih chuang hnuah Demilitarized zone (DMZ)-a Panmunjom khuaah official-a inbiakna an nei ve leh ta.

Panmujom khuaa inbiaknah hian South Korea aṭanga palai panga kalte chu unification minister Cho Myong-Gyon-an a ho a, North Korea aiawh pawh panga niin senior official Ri Son-Gwon-an a ho a ni. Inbiaknaah hian South Korea-a Winter Olympics neih tur chungchang chu an thlurbing deuh bik a ni.

South Korea-in Winter Olympics a thlen tur hi ramri bul, DMZ aṭanga km 80 chauha hla, Pyeonchang khuaah neih a ni dawn a ni. South Korea chuan he olympics neih tur hi an ram pahnihte inkara muanna thlentu atana hman a duh a, a duhthusam tihpuitlin a nih theih nan hian North Korea pawh tel turin a lo sawm tawh a ni. Winter Olympics hi February 9 – 25 chhung neih a ni dawn a ni.

Inbiakna an neih hnuah NKorea chuan Olympic Games neih turah hian palai tirh a remti niin SKorea chuan a sawi. NKorea in a tirh tur zingah hian infiammite bakah anmahni ṭawiawmtute an tel ang.

SKorea chuan Korean War avanga ram pahniha chhungkhat inṭhendarhte tan Winter Olympics neih chhung hian inhmuhkhawmna hun buatsaih a rawt bawk. He reunion hi Games neih lai, Lunar New Year holiday-ah an buatsaih rin a ni.

Olympics Games neihturah hian SKorea chuan Korea ram pahnih aṭanga infiammi telte chu opening ceremony-ah kal rual turin a sawm a, mahse hei hi North lam chuan an la chhang lo. Kum 2006 Winter Olympics-ah khan Korea ram pahniha infiammite hi Korean Peninsula flag hnuaiah a rualin an lo kal tawh a ni.

SKorea hian sipaite chungchangah pawh inbiakna neih a rawt bawk. Korea ram pahnihte hi kum 2015 aṭang khan a inkar boruak hi a chhe zual hle. North lamin rocket leh nuclear test an neih ṭhin avanga lungawi loin, South chuan North ram chhunga ram pahnihte thawhdunna, Kaesong Industrial complex pawh a lo khar phah tawh a, he hmuna an ram mi hnathawka awmte pawh a lo ko haw tawh bawk a ni. Hei vang hian North lam thinrim chuan South nena an inthlunzawmnate titawpin, telephone line thlengin a titawp a ni.

 

Credit, vanglaini

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!