Your Daily News

Donald Trump In A Tum 2-na Atan Office A Luah Leh Ngei Dawn Tih Pompeo’an A Sawi Chhuak

0 753

Tum tum US election zet zawng tum dang ang lo takin sawi tur leh hrilh tur a tam ngei mai. Biden leh Kamala Harris ten election-ah hneh taka tlinga an inngaih tawh lai leh news media hrang hrangte pawhin tlinga an tarlan tawh hnuin Pu Trump-a lah chuan hnehna a chang zawk tiin White House chhuahsan a tum hauh lo thung.

Secretary of State Mike Pompeo pawhin election neih zawh taka vote tla chhiarna thil dik lo awm chungchang chu sawilangin, Democrat presidential canditate Biden chuan awlsam takin White House a luah dawn loh thu leh Trump’an a tum 2-na atan rorelna a kalpui leh dawn tih huai takin a hrilh lawk ve leh ta!

Thawhlehni khan State Department’s headquarters-ah thu tawi sawina hun a neih laiin, Official-te chu Joe Biden rorelna tawmpui turin an inbuatsaih em? tih reporter-te zawhna chu chhangin “A tum 2-na atan Trump’an rorelna a kalpui leh dawn a ni” tiin nuisang chungin an zawhna a chhag let a ni.

Hemi ni tlailam vek hian FOX News special Report-ah Bret Baier chuan Pompeo thusawi chu a thinlung taka sawi nge a nih fiamthu ang chauha sawi nge a nih zawk, a zawt nawn leh ngat a, he hunah pawh hian rorelna chu an kalpui leh dawn tih sawiin American mipuiten engtin chiah nge thutlukna an siam tih leh an vote thlakdan dik tak chu an hmu thuai dawn a ni a ti bawk.

Inrinni liam ta a Biden’an hnehna a chan thu news hrang hrangah pawh puan a nih hnu khan Donald Trump chuan a pawm mai thei lova, Centre for Presidential Transition lamin rorelna inthlak kualdan tur bul tan thar tura an ngenna pawh a la thutak duh lo a ni.

Hetih lai hian Biden team lam chuan General Services Administration chu rorelna inhlanchhawn dan kawng duang thuai turin sawrkar chu dan hmanga a tul anga nawr turin an ti ve bawk.

Pompeo hnenah reporter-ten zawhna pein, Donald Trump leh amah tantuten vote thlak danah inbumna awm ang an sawi chu a pawmpui em? tih zawhna chu chhangin, a pawmpui thu a sawia, direct tak erawh chuan engmah a sawi lang lo.

“Vote dik tak chauh kan chhiar tur a nia, dan pawna vote tlate chu awmze nei lo an ni ang” tiin hnehna an chang ngei dawn a ti a ni.

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!