Your Daily News

Lung Manto £1.4m Man Zet Chuan A Inchung Rawn Deng Thlain Zankhat Thil Thuah Millionaire-ah A chhuah Dêr

0 3,592

Indonesia rama cheng pakhat chu a inchung atanga lung manto (meterite) rawn tla thla thut chuan zankhat thil thuah mihausa tawntaw (millionaire) ah a chhuah dêr mai le. He lung hi a suma chantir dawn chuan £1.4 million hu zet a ni.

Josua Hutagalung kum 33 a upa hi North Sumatra, Kalong khuaa khawsa a nia, mithi kuang siama eizawng thin a ni. Rinloh hlanin vawilehkhatah lung manto zet chuan an veranda chung zawn ah tak a rawn deng thla thuai mai a ni. He lung manto hi 2.1kg a rit niin an in sir leiah a tlathla zui a, 15cm vel leiah a lut nghe nghe.

Lung manto Meteorites te hi a man a tha ang reng hle maia, 1gram zelah US$5 anga chhut a ni. Hei aia manto leh vang zawk extra-terrestrial metals phei chu 1gram ah US$1,000 a tling pha daih a ni.

Josua chuan rang takin he lung hi an zuankhum nghal tih a sawia, a lakchhuah lai pawh hian a lum deuh tih a sawi. Lei a den nat em avangin a kehthem tlem hmuh tur a awm thu a sawilang bawk.

“A lung chu ka han chawi chho va, a lum deuh bawka hmanhmawh takin inchhungah ka luhpui ta a ni” tiin Kompas a hrilh.

He lungin inchung a den lai hian a ri a nasa khawp tih sawiin an chenna in pawh a khur hlawp thei a ti a ni. An thenawm khawvengte pawhin Josua chunga thil thleng chu an hriatpui thu leh an in lam panin mi thahnem tak an tlan sup sup tih an sawi.

He lung hi kum 4.5 billion zeta upa tawh niin a lo berah £1.4 million hu zet a ni. The Sun in a tarlan danin he lung manto hian Josua a kum 50 hlawh a hen a ni tih a tarlang bawk. A vanneiin a lawmpuiawm khawp mai. (Daily Mail)

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!