Silai Kenga Biak In Chhunga Luta Mipui Inkhawm Mek Thaha Vau Zuitu Misual Chu Pastor Huaisen In A Tudai!
November 7, Sunday ni khan US, Tennessee, Nashville ah misual pakhat chuan silai kengin Light Mission Pentecostal Church a mipui inkhawm lai a luhchilh a, Pathian Biak in maicham lamah kalin mipuite chu silaiin a tin a, kahlumah a vau zui tih an sawi. A thupekte chu zawm mai turin mipui hmaah a inhrosa vel a ni.
Biak in chhunga inkhawm mipuite chuan an hlauin chhuatah an bawhkhup nghal thuai a, tawngtaiin Pathian an au zui tih an sawi. Chu veleh silai keng misual Dezire Baganda kum 26 a upa chu silai a neih avang chuan a uang thuang hle a, a duhtawka chet lak a tum vel a ni.
Chu veleh pastor Ezekiel Ndikumana pa huaisen zet chuan misual chu a hmachhawn hmasa ber a, huaisen takin misual silai ken chu benthlaksakin amah Dezire Baganda chu a keuhthlu nghal thuai a, midangten rawn puih ve nghalin an man zui ta a ni.
Pastor leh a member te tanrualna avanga misual in silai a hmetpuak hman ta lo chu ropui an tih thu Police te chuan tarlangin, harsatna namenlo thleng tur chu Pastor huaisen tak avangin an pumpelh ta a ni.
Pastor Ezekiel Ndikumana kha huaisen ta lo se chuan kohhran ho zingah tah leh hathialna a thleng ngei ang le. A lehlam takah chuan Pathian awmpuina an chang a tih loh theih loh a ni.
