Nupa Inṭhen Hlim Bill Gates Leh A Nupui Melinda Gates-te Inkara Thuruk Inthup Chuan Khawvel Mite A Tihrilhhai Hle!
Khawvel mihausa Top 5 zinga langpha Bill Gates leh a nupui Melinda Gates-te an inthen thu Twitter kaltlanga puanzar a lo ni ta chuan khawvel mite a barakhaih hle! Bill leh a nupui hi sum lamah harsatna an neih a rinawm lova, fa 3 nei tawhin chhungkaw hlim tak an ni thin a ni.
Chhungkaw lar leh khawvel huap pawha midangte tan nasa taka sum hmanga tanpuina pea hna thawk thin an nia, engtin nge tiang hian an inthen mai theih le tih chu an mahni ngaisangtute zawhna lian tak pakhat a tling ni. An inthen chhanah thil chihrang hrang sawilan a nia, a thente chuan a nupui Melinda Gates chu an mawhpuh bawk a ni.
Internet khawvel a nih angin an inthen chhan an sawi tam tak zingah Chinese hmeichhe pakhat Zhe “Shelly” Wang chu mi bengverhtu ber leh mite ngaihven ber a ni tlat thung. An sawidanin Bill Gates leh a nupui Melinda inkarah Chinese nu Zhe “Shelly” Wang hi a tlazep niin an sawia, he thil hi a nupui Melinda Gates chuan hrechhuakin a pasal Bill chu a then zui ta a ni tiin thuthang a awm mek a ni. Zhe “Shelly” Wang hi ‘Bill and Melinda Gates Foundation’ ah tawng lettu ah tangin, a hna hi 2015 atang khan a lo thawk tawh a ni.
Mahse, kum 36 a upa Zhe “Shelly” Wang ve thung chu he an puhna hi thuthang diklo a ni tiin a pha ve thunga, “He thil hi thuthang diklo a nih avangin a tawpah chuan tumahin an bengkhawn lovang” tiin Chinese social media Weibo kaltlangin a tarlang a ni.
Pahausa Bill Gates leh Zhe “Shelly” Wang-te inkar thu hi thudik a ni ngei em tih hriat a ni chuang lova, an nupa karah inthenna hial a lo thlen tak avang hian thu inthup chu a awm ngei a ni tih ring an tam em em thung a ni.
An inthen chhan an sawi tam tak zingah Bill Gates chuan a bialnu hlui Ann Winblad chu a theihnghilh thei lo niin an sawi bawk a, kum tin vawikhat chawlh an hmang dun ziah thin niin an tarlang bawk a ni.
