Your Daily News

Kum 21 Liam Hnuah India Chuan Miss Universe Lallukhum Khum Thei Nula Chhuanawm A Vawrhchhuak Leh Ta!

0 2,113

2000 kuma Lara Dutta in Miss Universe lukhum a khum atanga a kum 21 liam hnuah, India nula chhuanawm Harnaaz Sadhu chuan Miss Universe lallukhum a rawn hawn ve leh ta!

Miss Universe inelna a vawi 70 na chu kumin 2021 ah Israel, Eilat ah nghah a ni a, India ram aiawhin Ms Sadhu chu he inelna ah hian a tel ve a ni.

Punjab nula Ms Harnaaz Sadhu kum 21 a upa chuan a elpui Paraguay nula Nadia Ferreira leh South Africa lam chhuak Lalela Mswane te chu hnawlthlain Miss Universe ah a inhlangkai ta a ni.

Chandigarh lam chhuak model Ms Harnaaz Sadhu in Miss Universe lukhum a khum hma hian India mi 2 actors Sushmita Sen (Miss Universe 1994) leh Lara Dutta (Miss Universe 2000) te chuan Miss Universe lukhum an lo khum tawh bawk a ni. Miss Universe lukhum hi Mexico lam chhuak Miss Universe 2020 Andrea Meza chuan Ms Sadhu a khumtir a ni.

Miss Universe Sadhu chu hmeichhiaten an nuna harsatna an tawh hunin engtin nge an lo hmachhawn ang tih zawhna pek a ni a, tunlai khawvela hmeichhiate mamawh ber chu mahni inrintawkna neih leh mi bika inhriatna rilru neih a tul a, chu chuan hringnunah parmawi tak a chhuah thin a ni tih chu a hmeichhepuite fuih nan a hmang nghe nghe a ni.

Hei bakah hian Ms Sadhu chuan midangte nena inkhaikhin chu tih tawp a hun tawh thu leh, kan khawvel hmun hrang hrangah engthil nge thleng tih lam chu ngaih pawimawh a hun tawh zawk thu a sawi lang bawk.

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!