Your Daily News

India Chhulchhuak, Zirtirtu Ropui Ranjitsinh Disale kum 32 A Upa Chuan Global Teacher Prize Lawmman 1Million A Dawng

0 177

Global Teacher Prize 2020 lawm man chu Maharashtra a sawrkar sikul, primary zirtirtu Ranjitsinh Disale kum 32 a upa hnenah hlan a ni.

Teacher Disale hi IT Engineer nih tum thin a nia, a tum lawk anga thil a kal tak loh avangin zirtirna lam chu hawi leh in Maharashtra, Soladpur District, Paridewadi, Zila Parishad Primary School ah zirtirtu hna a thawk zui ta a ni.

Zirtawpni liam ta khan Disale chu, zirna lamah hmeichhe naupangte tan a thawh hlawk em avang leh a hnathawh thatna avangin khawvel zirtirtu chungchuang Global Teacher Prize 2020 lawmman pek a ni ta a ni. He chawimawina hian sumfai 1Million zet a keng tel a ni.

Zirtirtu ropui Disale chuan khawvel pum huapa zirtirtu tha thlan chhuahnaah nominate a ni tih a hriatin, lawmman a dawng a nih ngat chuan Top zinga 9-te hnenah a sum dawn a zahve chu a pe dawn tih a lo puang lawk tawh nghe nghe.

Global Teacher Prize in a tarlan danin, Disale kum 32 a upa hi 2009 khan Sikul in awng rawp tawh tak leh ranten tlat nana an hman tawh hnu sikul chhe taka ngaih atangin hmeichhiate nasa takin lehkha a zirtir chho ta a ni.

He hmunah hian chhungkaw rethei tak tak atanga zirlai naupang kalkhawmte chu lehkha a zirtir mai bakah an hriattiam tur zawngin zirlai Bu grades 1-4 chu design tha leh vek tih an sawi. A thawhrimna avang chuan naupangten zirna in nuam an ti a, an attendance pawh chawhrualin 100% a tling pha hial a ni.

Hei bakah hian ‘Let’s Cross the Border project duangin, he platform kaltlang hian thalai tam tak India, Pakistan, Palestine, Israel, Irag, Iran leh US bakah North Korea ramchhunga zirlai naupangte chu ram pakhat leh a dang thlunzawmin naupangten an ngai pawimawh zawngte tihna leh an zirna lam kaihhnawihah inkawmhona an nei thin ani.

Tun thleng hian zirtirtu ropui Disale chuan khawvel ram 8 atangin zirlai naupang 19,000 zet he ‘Let’s Cross the Border’ project ah hian a la lut tawh tih an sawi.

He Global Teacher Prize 2020 lawmman dawng tur hian mi 12,000 atangin Top 10 List an thlifim leh a, heta mi 10 teacher tha filawr zing atang hian lawmman pakhatna dawng turin Disale chu thlan chhuah a ni leh ta a ni.

Global Teacher Prize Top 10 List (Winner tiam loin): Olasunkanmi Opeifa, Jamie Frost, Carlo Mazzone, Mokhudu Cynthia Machaba, Leah Juelke, Yun Yeong-hyun, Samuel Isaiah, Daoni Emanuela Bartan leh Ha Ant Phuong te an ni.

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!