Your Daily News

Yemen-ah Syria thlawhtheihna tla

0 404

Saudi Arabia kaihhruaia Arab ṭangrual ramten Yemen-a helho laka beihpui an thlaknaah, Syria indo thlawhtheihna chu a khawl lam fel loh vangin a tla a, pilot-te erawh an him a ni.

Hetihlai hian Yemen helpawl, Houthi-te chuan Syria thlawhtheihna hi an kah thlak niin an sawi thung.

Indo thlawhtheihna hi Saada province-ah a tla a, pilot pahnihte chu hliam tuar loin an awm a, heng mite chhanchhuah hna hi thawh nghal a ni.

Houthi helte hi Iran sorkarin a thlawp a, kum 2014 September thla khan an ram khawpui Sanaa chu lain an awp zui a ni. Sanaa khawpui bakah Yemen hmarlam bialte chu Houthi-te hian la zuiin, hetihlaia an ram president Abd-Rabbu Manosur Hadi pawh Saudi Arabia ramah a tlanchhiat phah a ni.

Kum 2015 March thla aṭang khan Saudi Arabia kaihhruai Arab ṭangrual ramte chuan Yemen sorkar thlawpin, Houthi hel ho lakah hian beihpui an thlak a ni. Yemen tualchhung indona thleng vang hian mi 10,000 vel an thi tawh niin UN chuan a tarlang a, mi tam tak chu dinhmun hrehawm takin an awm mek bawk.

 

credit, vanglaini

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!