Your Daily News

US-IN KUM THARAH JERUSALEM-A EMBASSY SAWN A TUM

0 938

Israel tlawha zin, US Vice President Mike Pence chuan kum 2019 kum tawp lamah US chuan Jerusalem-ah embassy a hawng dawn tih a sawi.

Nikum December thla khan US President Donald Trump chuan Jerusalem chu Israel khawpuia a pawm thu leh, Tel Aviv-a US embassy pawh Jerusalem-a sawn tura hma lak a nih tur thu a sawi a ni. President Trump-a thutlukna siam hi Palestinian leh Arab ramte chuan an sawisel nasa hle a, hmun hrang hranga lungawi lohna pawh an lo lantir tawh a ni. Hei bakah hian ramdangte pawhin an pawmpui loh thu an sawi. United Nations-ah President Trump-an Jerusalem chungchanga a thutlukna siam hi ngaihtuahin vote lak a ni a, member 128 in an hnawl a, a thlawp lamah vote 9 chauh a tla thung.

UN-a US palai Nikki Haley chuan President Trump-a thutlukna hnawlsak ni mahse, US chuan Tel Aviv aṭanga Jerusalem-a embassy sawnna tur ruahmanna chu a kal tlangpui dawn tho tih a sawi. “America chuan Jerusalem-ah embassy a dah dawn a ni. Hei hi America mipuite duhdan pawh a ni a, thil tih tur dik tak a ni.  UN-a duh loa vote thlak hian engmah danglama a siam phah dawn lo”, tiin a sawi. Mahse UN-in US sorkar thutlukna siam a hnawlsak avang erawh chaun America miputien UN an hmuh dan chu a dan phah tawh ngei dawn niin a sawi bawk.

Middle East ram pathum tlawha  zin mek, US vice president Mike Pence hian Thawhṭanni khan Israel a thleng a, nimin khan Israel Parliament, Knesset-ah thu a sawi. Pence hi US vice president zinga Knesset-a thu sawi hmasa ber a ni. Thu a sawi hma hian Arab MP-te chuan lungawi lohna lantir a, ‘Jerusalem hi Palestine khawpui a ni’ tih ziakna lehkha te an lo lek khum avangin House aṭangin chhuahtir an ni.

 

credit, vanglaini

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!