Ukraine Mipui Sualna Neilo Leh Naupang Pawisawilote Nunna La A An Chetdan Rapthlak Tak Chhuikir Lehin Russian Sipaite Lungngaiin An Tap!
Russian sipaiten Ukraine an beih mek laiin Putin sipai engemaw zat chu an hmelma Ukraine sipaiten an lo man ve bawk a, Ukrainian President Volodymir Zelensky pawhin Russian sipaite chu an kuta inpe a indo bansan turin a lo thlem ve mek bawk.
Russian sipai an mante leh an kuta inpe te chu tihnat leh kahhlum aiin duat taka enkawl an tum thu president Zelensky chuan a sawi chhuak a ni.
President Zelensky-a’n he thu hawihhawm leh thu ngaihnawm tak a sawichhuah hnu hian, Ukraine sipaiten an man tak Russian sipaite chu an thil tih inchhirin lungngaiin an tap zui tih hriat a ni.
Kar liam ta khan Russian sipai Officer 7, Ukraine sipai awmna enthla tura Ukraine ramchhunga lutte chu an thlawhna kahthlaksak an ni a, an zavai hian man an nih hnuah Interfax Ukraine News Agency lam chuan chanchinbu mite hmaah tawngchhuahna hun tha an siamsak ta a ni.
He hunah hian Putin sipai officer zinga pakhat thlawhna khalhtu (Pilot) Sergey Galkin chuan Russian sipai hotu lu te chu na takin a kap zui a, ramphatsantu leh mi dawizep ber an ni tiin awka a chhuah a ni. An zavai hian mittui nen hun an hmang a ni.
Thu a sawi mek lai chuan a rawn tap chhuak hlawl mai a, Ukraine ram mipui zawng zawng, naupangte, kawtthler tin, in tin, a thawhpuite leh amah chungah ngei pawh ngaihdam a dil thu tap chungin a sawi chhuak a ni. Indona chawkchhuaktu an ni chu pawi a ti tak zet tih lungchhe takin a sawi a ni.
Ukraine mipui sualna neilo leh naupang pawisawilote nunna la a an chetdan chu lungchhiatthlak a tih thu sawiin, chanchinbu mite hmaah mittui tlain a tap chhuak hial a ni. Hei mai a la nilo Russia ramah ngei an President Putin-a chetdan duhlotu a ni telin an pung mek zel bawk.
