Turkey Lirnghingah Darkar 91 Ral Hnuin Hmeichhe Naupang Kum 4 Mi Chu Nungdam Chhanchhuah A Ni
Turkey, Izmir khawpui lirnghingah ni 4 lai a liam tawh hnu leh chhiatna rapthlak tak thleng karah hmeichhe naupang kum 4 mi chu mak tak maiin him dam taka chhanchhuah ani.
He hmeichhe naupang hi lung keh kar atanga lakchhuah a nia, Ambulance hmangin hmanhmawh takin damdawi in lamah tlanpui nghal a ni. Chhanchhuah hna thawktute chuan “Pathian ropui rawh se” tiin kutbengin naupangtê hi an lo lawm tih an sawi.
He hmeichhe naupang hi Ayla Gezgin tia koh niin kum 4 a upa a ni. Zirtawpni liam ta a Turkey lirnghingah khan vanduaina tawkin he naupangte hi a bo zuia, darkar 91 lai mai lung keh kara a awm hnuin vanneihthlak takin an chhanchhuak ta ani.
Chhanchhuah hna thawktute zing a mi Nusret Aksoy chuan naupang tap thawm a hriat thu sawiin theih tawp chhuaha an zawn hnuah nungdamin an la chhuak ta a ni.
Rescue worker sawi danin Ayla hian a kutin a lo huia, a dam tha tih chu zaizira hrilhin amah chhanchhuak turin a hui mawlh mawlh tih a sawi a ni. Pathianin a veng a ni ngei ang, lung keh karah a lo him hlauh mai a ni.
