Your Daily News

Trump-an US dodal zawnga vote-te ṭanpuina tihtawpah vau

0 1,249

United Nations General Assembly-ah US-in Israel khawpui atana Jerusalem a pawmna hnawlna leh sut tura phutna draft resolution pharhin vote lak a ni dawn a, US President Donald Trump chuan resolution thlawp zawnga vote ramte chu ṭanpuin an pek ṭhin tihtawpah a vau.

United Nations Security Council (UNSC)-ah Jerusalem chungchanga draft resolution putluh chu US hian a veto hmangin a lo hnawl tawh a ni.

UNSC-a hnawl a nih hnuin Arab leh Muslim ramte ngenna angin  UNGA ah hian draft resolution hi ngaihtuah turin emergency special session koh a ni. General  Assembly-a vote lak hian thutawp siam kawngah erawh awmzia a nei thui lo a, mahse Jerusalem chungchanga member-te ngaihdan hriatna pawimawh tak a ni dawn a, a hnu lama politics lama innawrna kawngah thawm a neih len phah thei dawn thung a ni.

General Assembly-a vote lak a nih hmain, President Trump chuan US-in a ṭanpui ṭhin ramte vote thlak chu uluk taka chhinchhiah turin alo ti tawh, UN-a US ambassador Nikki Haley-i chuan member ram eng emaw zat hnenah pawh lehkha a lo thawn tawh bawk. Trump chuan an ramin dollar maktaduai telin ṭanpuina a pe ṭhin a, hetichunga US thutlukna dodal zawnga an vote a nih chuan ṭanpuina an pek ṭhinte chu tihtawp a ni ang tiin, “An duh chuan mi dodal zawngin vote thlak se la, sum tam tak kan hum theih phah a ni mai dawn a ni”, a ti.

President Trump hian December 6 khan US-in Israel khawpuiah Jerusalem a pawm thu a puang a, US embassy pawh Tel Aviv aṭangin Jerusalem-a sawn a nih tur thu a sawi bawk. He a thutlukna siam hi Palestinian bakah ram dangten an sawisel nasa hle a, Muslim-te chuan hmun hrang hrangah lungawi lohna an lantir a ni.

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!